近年荷李活影壇嘅發展同香港好似差唔多，都係如果一部電影收得就跟住拍落去，所以呢幾年愈嚟愈多續集推出，今年當然亦唔例外，一堆續集電影排住隊上畫。
繼舊年《變種特攻2》同《22世紀殺人網絡》系列二、三集大收旺場之後，今年《蜘蛛俠》續集同《史力加2》都係萬千影迷期待已久嘅大製作，呢兩部片嘅第一集當年上畫收得咁勁，電影公司自然對新作寄望甚殷。
不過呢兩部大片分別喺六月同下個月先上映，反而另一部備受矚目嘅《標殺令２》就喺美國呢個星期五面世，而香港月尾亦會有得睇。不過呢部片同其他續集有啲唔同，佢係因為太長先要分兩集上啫，但無論如何，大家終於可以睇到奧瑪花曼（UmaThurman）飾演嘅女殺手同殺手組織頭目阿標嚟個正面對決喇。
而七月就有麥迪文（MattDamon）嘅《叛諜追擊》續集，阿麥喺續集入面會繼續佢亡命天涯嘅生活，至於美娜祖華維茲（MillaJovovich）喺十月開畫嘅《變種生還者》續集入面，就會再同殺之不盡嘅喪屍周旋，到咗十二月就會輪到長拍長有、改編漫畫作品嘅殭屍片《幽靈刺客》第三集上映喇。