46664抗愛滋 - 左丁山

復活節假期第一日，四月九日上午，睇NBA籃球，帝皇對木狼，打得非常燦爛，好好睇。NBA西岸勁旅如雲，東岸只得兩隊（溜馬、活塞），季後賽爭霸，西岸冠軍冇理由唔係NBA冠軍嘅。
球賽暫停，賣廣告之時，㩒住遙控，無意中睇到亞視國際台播出大型音樂會，現場觀眾人數多過我哋嘅「維港巨星匯」幾十倍。而且老歌星雲集，螢光幕上不斷打出前南非總統曼德拉嘅樣子，歌星又叫人打46664電話，猛唱foursixsixsixfour，究竟係乜冬冬呢？

按圖索驥，上網查資料，有一個www.46664.com 網站，內裏介紹，46664原係曼德拉在南非RobbenIsland坐監十八年嘅監犯號碼。曼德拉宅心仁厚，關懷愛滋病，佢認為愛滋病散播得太多太遠，已經唔係一個傳染病問題，而係一個基本人權問題，人有免於受愛滋病之苦嘅權利。曼德拉去年十一月與著名流行音樂家DaveStewart、JoeStrummer交流，將佢嘅監犯號碼46664交畀佢哋作曲（歌詞內包含呢個冧巴），佢哋發動全世界歌星開辦音樂會，喺倫敦紐約洛杉磯舉行，發行46664CD，一切收入用作支持對抗愛滋病行動。
曼德拉聲望高，號召力強，一個46664號碼，席捲全球流行音樂界，齊為對抗愛滋而努力。各位想聽音樂而捐錢嘅話，不妨上www.46664.com 睇吓，了解詳情。