近排股價一直企硬嘅華人置業（127），放完假後立即有動作，收市後公布以每股4.85元，配售1.35億股舊股，連埋隻「綠鞋」，最多批成2億股，大股東最多可套現9.7億銀。華置配股價4.85元，比起噚日收市價5.50元，折讓11.8%。
聽見呢個消息，小初都有多少愕然，皆因小初原本諗住人哋會食大茶飯，唔會在5元樓下批股。經紀陳話，由於同系嘅利福國際（1212）即將在周四掛牌，減持華置一事，令唔少人以為係睇好利福之象。
以上人士的主觀願望能否實現，就要到星期四先知，但聽聞華置配售舊股反應一般，難望好似早前思捷（330）大股東減持後，股價仍然勁升，總之一句講晒，有華置在手者要執生。
另外，上聯水泥（1060）自從公布完靚靚業績後，股價一直造好，噚日又升14.5%，收0.71元。不過，經紀陳撥小初冷水，話檸檬茶系股份向來難炒，貨源分布數得好清楚，想賺佢哋錢唔容易。
慕容小初