靚仔藝人同一線女星一直都冇公開過戀情，但緋聞就傳得好勁，不過佢哋已經散咗幾個月，原來係佢哋對戀情嘅態度出現分歧。靚仔藝人向來花弗，一線女星當然覺得冇安全感啦，所以當佢哋拍咗拖冇幾耐，一線女星就好想公開戀情。
雖然一線女星嘅事業如日方中，但佢好愛靚仔藝人，寧願冒住事業下滑嘅危險都要公開戀情，佢諗住外界知道男友名草有主後，起碼會少咗好多女人黐埋去。但係靚仔藝人唔係咁諗，佢覺得自己事業重有得上，加上呢段感情未穩定，公開戀情冇好處。
一線女星同靚仔藝人因為公唔公開拍拖，成日嗌交，加上靚仔藝人驚俾狗仔隊影到相，於是唔肯接送女友，一線女星當然覺得男友對自己唔好，情緒成日失控。久而久之，佢哋嘅感情出現好大裂痕，不過馮仁昭知道一線女星𠵱家對靚仔藝人重未忘情！
金像女星雲妮絲惠嘉（ReneeZellweger）同金像導演安東尼明格拉（AnthonyMinghella、左）為佢哋合作嘅電影《亂世情天》去內地宣傳。噚日佢哋重喺北京出席記者會，其中安東尼好識做咁大讚中國電影，話佢最欣賞同欽佩就係中國電影人。而雲妮原來就提早兩日訪華，秘密同男友JackWhite遊覽長城等名勝。
早前喺上海發生交通意外嘅張佩金𠵱家仍喺當地留醫，噚日接受新城嘅電話訪問時話：「首先多謝大家嘅關心，我一醒番，屋企人就話畀我知意外嘅發生經過。我聽完好驚，原來當時情況咁危險，不過我最接受唔到係身上嘅疤痕，自己都有啲心理唔平衡，因為我好貪靚，所以𠵱家唔想見人住，總之希望快啲好番。」馮仁昭都希望佢早啲返香港同fans見面啦！
噚日有內地網頁話台灣方面就總統選舉前夕發生嘅槍擊案，搵咗神探李昌鈺調查呢件事，台灣中影公司方面就諗住食住條水，開拍一部名為《神探李昌鈺》嘅電影，搵周潤發做男主角。但馮仁昭好肯定講句，搵發哥做男主角嘅機會真係微乎其微，因為𠵱家發哥傾緊幾部西片，又邊度有時間去台灣開戲呀？
陳彥行噚日着住件桃紅色貼身裙喺馬鞍山出席活動，身材玲瓏浮凸，非常誘人。行姐除咗身材好之外，皮膚一樣咁靚，佢話：「我都好鍾意食燕窩，最鍾意就係清燉，不過中醫話燕窩有少少偏寒，好似我呢啲寒底人就唔好食得咁密，可能一個月食一次就得。」唔怪得佢皮膚滑一滑啦，真係恨死唔少女性！
