香港郊遊徑均各有特色，太古的康柏郊遊徑，道路並不康莊，左右兩旁不時出現巨大怪石擋路，行康柏，就像真的走進巨石森林。雖然路程無風險，但行的時候依然要留神，不要以卵擊巨石呀，否則撞崩鼻無得賠㗎！
記者：陳震霖 攝影：陳智良、部份相片由漁農自然護理署提供
模特兒：Agnes、Karen（Space2）
康柏郊遊徑，全長3.6公里，不消2小時就行完，路程短卻非平平無奇，這徑的特點是，巨石特多，平均差不多十分鐘，就有大石擋路。睇開足球的Karen重話：「石頭出現的位置真係估佢唔到，一時就喺你左邊進攻，一時就係右邊，冷不提防，間唔中又會左右夾擊。」Karen並無誇張，真係隨時隨地「梗有一舊喺左近」。雖則巨石多的是，但就冇乜驚險位，大石似曉讓路（抑或應該多謝開路的人呢？），不會要你攀石，也不會迫你下走山坡繞路而行。到郊遊徑尾聲，路中心有一張天然大石床，行得累了，在上面小休也行。眺望山下鰂魚涌、西灣河美景，心情豁然開朗。
離開郊遊徑轉入柏架山道一段，Karen突然停下腳步，凝望着樹叢深處，細問之下，她輕聲的說：「頭先有隻松鼠喺樹上走過呀，好可愛！」這兒一帶是赤腹松鼠出沒範圍，牠們拖着長長尾巴，全身灰棕色，腹部是橙色。想一睹牠們可愛模樣，最佳方法是留意地下有沒有果實硬殼，因為這些果實和種子是牠們主要食糧。如果揀平日比較少人行山的日子，會更容易看到的。雖然全年均是赤腹松鼠的繁殖期，但在十一月和二月，牠們發出的求偶叫聲特別多，到時行過樹底聽到怪聲都唔好亂諗嘢啦。
完成康柏徑，都只是半晝時間，不妨到樹木研習徑賞樹。研習徑屬於衞奕信徑第二段。一邊行研習徑，一邊睇傳意牌，來上一課生物課，了解共21種樹木植物，如鴨腳木、黃牙果等等。途中還有兩個二次大戰遺留下來的爐灶遺址，今次不是來懷舊，也不是來捉迷藏，而是來賞花。在爐灶上面賞花？對呀。爐灶場的確像一個小型花展。經過晨運客多年悉心栽培，將爐灶填滿泥土，撒下種子，現在爐灶上已生長出不少色彩奪目的花朵，大紅花、薑花、日日春、野生菊花等等，把戰時悲傷埋走，化作春泥更護花。
最後，走過第三個爐灶場之後，來到康柏橋。橋底的流水來自上游山澗，還不是下雨季節，山澗水不多，中間夾雜着小水潭，流水經過橋底直入引水道。很多遊人過了康柏橋之後不選小徑，另沿引水道落山。橋旁有燒烤場，在此BBQ可以獨享小橋流水的優美環境。最後，輕輕鬆鬆完成研習徑，步行小段康柏郊遊徑落興東邨離開。
落到興東邨剛剛三點三，做完運動又未有胃口住。不妨整番個特餐（$22）食碗公仔麵，再加腸仔煎雙蛋，包你先前疲倦一掃而空。
興東茶餐廳（21361207）
地址：興東樓商場1樓112號
交通
去程：太古地鐵站B出口，上基利路盡頭入衞奕信徑，再入康柏郊遊徑。
回程：興東邨落西灣河地鐵站離開。
