紳寶汽車（Saab）近年推出多個新車款，如新一代9-3SportSedan及其開篷版，而響今屆美國紐約國際車展上，佢哋就展出咗一部走SUV路線嘅9-7X，同樣成為會場焦點。
記者：鄭達基
呢部在場展出嘅紳寶9-7X，用上一個帶有濃厚年輕活力感嘅SUV造型，相比起其他紳寶車系來得更具吸引力，當中一對頗有神氣嘅頭燈，襯以大幅鬼面罩、18吋跑車合金胎軨，加上簡潔嘅車尾線條，就最能將呢個特點展露出嚟。由於軸距長達2870mm，故此不但能為車上乘客帶來充裕嘅乘坐空間，同時亦可提升擺放行李嘅空間，另外當然唔少得重有廠方為9-7X所安排嘅多項車廂設備與及安全配備啦！
廠方特別為9-7X安排兩台引擎作配搭，當中包括一台4.2公升直6型號，馬力輸出數值為275ps/6000rpm，扭力則為38.0kgm/3600rpm，另一台則係頂級版所採用嘅5.3公升V8引擎，運轉寧靜順滑唔在講，最重要係馬力及扭力輸出數值分別係300ps/5200rpm，同埋45.6kgm/4000rpm，用以驅動此車可謂綽綽有餘；而AWD系統及跑車懸掛組合，亦可增強操控表現。