歐洲幾個大球會，今屆成績麻麻（其實已經好好，不過攞唔到歐冠杯，老細就未必肯收貨），譬如曼聯、阿仙奴、AC米蘭、祖雲達斯、皇家馬德里、拜仁慕尼黑等等。睇佢哋嘅表現，跑長途賽跑到四月，啲球員已經疲態畢露，曼聯二月份已經冇氣唞，連場失準，歐冠杯出局之後，先至開始回勇，喺足總杯踢走阿仙奴。阿仙奴為咗追逐三冠王，但人腳唔多夠，到最後重要關頭，因賽程緊湊，我哋見到皮里斯、亨利兩位主將，對曼聯、車路士，已經慢晒軚，不能發揮威力。皇馬亦一樣，後防長期不穩，靠六條煙強攻對手，到咗四月，朗拿度狀態回落，施丹殘晒，碧咸冇表現，咁就玩完。你睇皇馬對摩納哥，領先一球，連輸咗三球，下半場大把時間追，但係中前場冇法子施展壓力，球員冇氣力追；至於AC，球員除咗冇態之外，贏咗四比一先，有乜理由作客唔打穩守突擊戰術呀？皆因AC嘅會長亦即係意大利總理貝魯斯科尼曾經寫信畀領隊安察洛提：「如果唔打兩個前鋒，就炒你魷魚。」既然大老闆有令，AC就採取攻擊性戰術，放棄一貫傳統意大利防守悶功，結果就係大敗而回。
下一季重杰呀，九月後賭波，千祈咪盲目睇好強隊，因為歐冠杯結束冇耐，六月就有歐洲杯，各大球會有好多球員屬疲兵作戰，到咗七月，大球會就要去打表演賽，到美國亞洲搶錢（如去年皇馬訪港，曼聯訪美），八月中旬，英超聯又開鑼，你估亨利、傑斯、施丹等人係鐵打嘅咩，下一季季初必定失準，到時大球會捧唔過。