如果要聽香港人嘅民意，最好去遊行。君不見，前日好多人攞住老董人頭氣球喺度洩憤，有個年輕人話，出嚟做嘢，人工重低過做暑期工，都係老董冇用。
有兩位徐娘半老，搽晒指甲油嘅女士喺八方前面等警察放行，兩人雞啄唔斷鬧老董，話平日下晝本來喺屋企打緊牌，但係一諗起老董咁冇能要人大釋法，即刻由麻雀枱彈起身，走去遊行，牌都唔打，真係犧牲大。
而老人家王伯就攞埋張身份證畀八方睇，話自己八十歲都要行，因為釋法實在可惡。
八方聽佢嘅口音唔似廣東人，一問之下，知佢祖籍山東，原來係國民黨老兵，四八年已經嚟香港，一路反攻唔到大陸，咪留係香港，個女都港大畢業，但係既然同共產黨鬥爭咁多年，唔爭在上街遊行抗爭到底。
傳真︰2623-9278
電郵︰