英國球星碧咸連日來被多名女伴大爆風流史，這位萬人迷雖然一身蟻，但不少娛樂圈中人昨仍表態力撐碧咸，鄭希怡直指爆碧咸性史的女助手盧絲「唔知博乜」，劉德華更笑指媾女辛苦過踢波，相信碧咸無此多餘精力。惟獨李彩樺（Rain）和發嫂指碧咸對妻不忠令他形象破滅。
向有英國萬人迷稱號的球星碧咸，繼日前被前女助手盧絲大爆性史後，連日來再有多名女子自稱與碧咸有曖昧關係，前日一名女模瑪貝克又自爆曾在新加坡與碧咸邂逅，兩人在酒店鬼混後以短訊繼續傳情。
李彩樺昨日出席馬鞍山一個公開活動時，直言對碧咸感失望，她說：「睇完報道之後對佢印象改觀晒，啲短訊好激，對佢嘅感覺都幻滅晒，今次咁樣係破壞佢形象，我愈嚟愈覺得靚仔冇本心，唔可靠，都係踏實啲好，好過外表靚。」
而周潤發太太陳薈蓮則在電話中說：「要維繫一段婚姻唔係咁簡單，一段婚姻有問題，兩公婆都有責任，如果碧咸真係對妻子不忠，咁佢作為人夫同兩個細路嘅爸爸當然唔啱，但佢老婆如果為事業太忽略家庭，一樣有責任。不過點都好，為咗兩個細路可以喺健康家庭成長，希望佢哋可以度過呢次婚姻危機。」
九巴媳婦雷林靜怡則表示對碧咸偷食的新聞半信半疑，她說：「如果係真嘅，就真係對佢好失望，佢本來形象好好，靚仔又有個健康家庭，不過我都唔排除係有啲唔出名嘅女仔想借佢出名，我覺得Victoria都好慘，我唔特別討厭佢，佢着衫都幾靚吖。」
不過，身為碧咸fans的劉德華昨日在電話中說：「我就唔係好信，呢個世界係咁，有一個出嚟講，就會愈嚟愈多人講，𠵱家定佢罪會唔會早咗啲呢？」華仔表示在真相未明前，他會選擇相信碧咸是清白，他說：「佢作為世界級球員，每場比賽都受到世界矚目，壓力好大㗎，所以一定要日日練波，練都練到索晒氣啦，重有咁好精力去媾咁多女？我就覺得媾女辛苦過踢波，如果佢真係咁堅，不如將識女仔嘅所有精力去參加十項全能，一定係鐵人呀。」
另一位碧咸fans鄭希怡（Yumiko）昨日亦在電話中力撐偶像說：「好多嘢唔知真定假，樹大招風，但我撐佢㗎！佢成日帶住老婆同兩個仔四圍走，畀我印象都幾好。」Yumiko又直指首位自爆與碧咸有染並大讚其床上功夫的盧絲沒口德，她說：「我覺得佢冇必要咁講囉，都唔知博乜，使唔使呀講到咁樣？聽落好唔舒服。」
張燊悅亦是皇馬球迷，身在上海拍劇的她昨日透過長途電話說：「碧咸成功、靚仔又有錢，好多人都想同佢有路，我諗當中有啲真亦有啲假，我覺得佢兩公婆都有責任，碧咸成日周圍飛，咁多女仔飛埋佢身邊，而佢老婆又要湊細路，到佢兩個出街時又次次俾人影，根本唔係一個正常家庭，有時真係好難協調。」
至於去年在皇馬訪港晚宴上與碧咸有一面之緣的名媛尹婉媚亦說：「我覺得呢啲嘢好正常，碧咸咁靚仔，冇外遇、冇女人埋身至奇，況且𠵱家都冇話一夫一妻制㗎啦，可能Victoria陪唔到佢，佢哋外形上又確係似兩姊弟嘅，而且Victoria身材又假嘅，我唔會對碧咸失望，人不風流枉少年嘛，佢又唔係聖人，如果我係碧咸，搞多啲㖭呀！不過我睇碧咸都係需要個可以睇住佢、比佢強嘅女人睇住，呢啲事咪當係佢兩公婆嘅考驗囉。」
此外，名人馬主胡寶星昨晚出席一郵輪晚宴時說：「碧咸叻仔又靚仔，有外遇好正常，冇先係新聞啦，男人就係咁，耐咗覺得個老婆冇新鮮感，自己嗰個瘦嘅咪出去搵個肥囉。」
採訪：蔡如育、朱倬誼、梁錦雯
