羅范失言，話特首投資最多喺學生身上，所以學生最冇資格鬧特首，如果羅太喺澳門做官，可能就唔使道歉，因為澳門鏵哥肯定最認同要尊重米飯班主。
八方有位政壇老友嘅第二代，前排去澳門散心，發現多咗好多大陸佬，佢最唔慣就係人人都唔守規矩排隊。過澳門海關時，有大陸人打佢尖，呢位血氣方剛嘅後生仔出言指摘，對方扮聽唔明，後來呢位打尖嘅大陸人讓步，畀佢排先，後生仔堅持要對方排番隊尾。
最後有澳門海關人員過去調停，俾人鬧嘅竟然係呢位正義嘅後生仔，因為位海關人員話佢排嘅隊係「香港及內地居民」，有另一條只為「香港居民」嘅隊，點解佢唔過去排喎。
睇嚟呢位澳門海關人員，深明去得澳門玩嘅大陸人分分鐘一百幾十萬咁貢獻畀燊哥同鏵哥，大陸點止係米飯班主，直頭係澳門嘅奶媽，最冇資格鬧大陸人嘅係邊個，唔使講都知啦。
傳真︰2623-9278
電郵︰