自從羅素卻爾（RussellCrowe）憑○一年套《帝國驕雄》贏咗奧斯卡影帝之後，荷李活突然間有好多電影都玩鬥士Look。最近英國雜誌《OK！》搞咗個史上最有型鬥士選舉，除咗羅素順利入圍之外，重有好多靚仔上榜。
型男畢彼特（BradPitt）同奧蘭多布魯（OrlandoBloom）套新片《Troy》雖然重未有得睇，但佢兩個已經憑裏面個造型入榜。而扮完阿歷山大大帝嘅哥連菲路（ColinFarrell），亦憑《Alexander》裏面個造型入圍。《魔戒》型男維高摩天臣（ViggoMortensen），以至主演《狂野武士》嘅澳洲男星希思萊杰（HeathLedger），亦雙雙以野性造型打上榜。
至於近排緋聞纏身嘅碧咸（DavidBeckham），早前喺百事廣告以羅馬鬥士打扮示人，亦當然唔少得。不過令我羅拉有意外嘅係，就連《驚世未了緣》裏面披頭散髮嘅米路吉遜（MelGibson）同五九年《賓虛》裏面嘅查爾登希士頓（CharltonHeston），以至六○年《風雲群英會》嘅卻德格拉斯（KirkDouglas）都入圍。