呢輪三色台係咁縮皮同減藝員嘅騷錢，搞到成間電視台怨氣沖天。講起老闆孤寒，馮仁昭覺得某電影公司個老闆娘就真係孤寒到離晒譜。話說有年啲釘跌價，佢以為買多啲就慳多啲，結果就一次過入咗幾噸釘，但以佢公司嚟講，十年都用唔晒啲釘啦！結果幾年後啲釘全部生銹，變晒垃圾，真係好慳唔慳！
馮仁昭又記得有年間公司請某天王拍戲，出外景時，因為件戲服着到天王好唔舒服，所以就叫製片買過件衫畀佢，但當時製片話要先返公司簽咗批准文件先買得，結果前後搞咗四、五粒鐘先可以開番工，你話佢公司係咪計錯數？件汗衫唔使一百蚊，但停工幾粒鐘條數就襟計，如果老闆娘唔係定落咁多無謂規矩就唔使搞到咁啦！
梁漢文（Edmond）同蒙嘉慧等噚日喺天后，出席電影《晚晚發惡夢》嘅開鏡拜神儀式。有年幾冇拍戲嘅Edmond話今年除咗唱歌，會集中精神拍戲，佢重話：「經理人話重有三部戲幫我傾緊。」而最近甩拖嘅蒙嘉慧話，同佢合作拍緊TVB劇集嘅方中信已答應會包佢使費直到搵到男朋友為止。嘩！咁咪同包二奶差唔多？
魏駿傑、滕麗名同苑瓊丹，噚日喺銅鑼灣替李錦記擔任美食大使。魏駿傑同滕麗名話兩人喺屋企都係輪住煮飯，不過自認煮飯有一手嘅傑仔就話：「煮飯點都係男人叻啲。」滕滕喺旁邊又猛咁點頭，咁識做，傑仔做煮飯公都心甜啦。佢哋重話自從《陀槍師姐IV》大結局後，啲人見親傑仔都問：「你死咗未？」
日前台灣傳出話李安同台灣女星、有份拍《向左走．向右走》嘅關穎見面，原因係李安覺得關穎英文唔錯，而且有芭蕾舞基礎，所以想搵佢拍《臥虎藏龍前傳》，做少女時期嘅俞秀蓮（楊紫瓊角色）。關穎噚日話自己同李安喺金馬獎頒獎禮見過一次，之後冇再見過，佢都好期待可以同李安合作，但係又唔敢諗太多，驚到頭來空歡喜一場。
樂隊芳華十八噚日出席喺將軍澳新都城中心舉行嘅《輕歌妙韻復活節》活動，芳華十八將會喺許冠傑演唱會入面擔任中樂部份嘅表演嘉賓。提到前日首次同許冠傑綵排時，佢哋都重未興奮完，樂隊成員甘雅丹重自稱「瘋狂阿Sam迷」，她以半鹹淡廣東話說：「我同佢講我好屎（喜）歡佢，佢就對我笑。」
