歐洲冠軍杯八強賽事，爆冷頻頻，一啲事先被認為係奪標嘅熱門如阿仙奴、皇家馬德里、AC米蘭，竟然全部下馬。阿仙奴對住車路士算係旗鼓相當，輸咗不足為奇。但皇馬首回合領先摩納哥四比二，AC米蘭首回合領先四比一，有乜理由喺第二輪分別輸番一比三、○比四㗎？好多球迷賭波，相信會輸死，《新報》頭版報道（四月九日）香港球迷輸咗二億銀，澳門與馬會成為大贏家，可能有根據。
唔係自認牙擦，上星期同八卦陸喺又一城食晚飯之時，佢問我捧阿仙奴抑或車路士，左丁山認為兩隊係五五波，但車路士有三點六倍，阿仙奴只得一點九倍，賠率差距大，一定買車路士。唉，本應贏錢嘅，但投注之時，貪念又起，諗住皇馬對住摩納哥，橫睇掂睇，都佔優勢，於是本來買單W車路士嘅，變咗買「主客和」二穿三，車路士射落皇馬，每注一百元。再買一條二穿一，投注共四百，諗住贏番鋪杰嘅。結果車路士贏二比一，皇馬輸波，投注四百，得番三百六，重要輸四十，為之氣頂。
第二日照辦煮碗，認定波圖贏硬，AC米蘭輸波（一兩球喇）出線，於是買一條波圖拉科魯尼亞二穿三，唉吔，波圖臨完場被里昂逼和，到了口嘅彩金又試飛走，倒輸百幾銀，真係冇運。以後賭波都係唔好咁貪心，買單W算數。至於邊隊攞歐冠杯？左丁山買車路士。