反釋法大遊行撞正復活節，都有兩三萬人去，好唔錯。以往遊行都係由維園出發去政府總部，今次就改為由中環遮打行人專用區行去干諾道西中聯辦，唔少西區景點好似西港城都旺晒。
今次創新行去中聯辦，都係北京攞嚟衰，本來香港人嘅矛頭係指向老董，人大係要出手釋法，激起港人把火，大家咪掉轉槍頭囉。唉，老董唔生性，𠵱家連北京形象都破壞埋，你話幾大罪。
講番遊行，劉慧卿同梁耀忠今次罕有地同華叔一齊拉住支大旗一馬當先，八方問佢上星期點解唔見喬曉陽？卿姐話自己上周喺歐洲，前晚先返港，梁耀忠就話見都冇意思，法都釋咗。
卿姐同媽田李柱銘早前都俾土共同京官追殺，噚日就好多人搵佢哋簽名拍照，成個明星咁款，媽田企喺架籌款車旁邊，希望多多益善。聽何秀蘭講，今次集會遊行印單張同音響等開支，要成十萬大元，所以一定要叫咪呼籲市民幫補吓。何秀蘭重好緊張要八方同佢澄清，佢唔係要同余若薇同梁家傑拆隊，自己一個人去參加九月選舉，佢只係講過，如果泛民主派港島區五個人分五條隊出，可能勝算更大。消息一出，余若薇已經打電話，話自己可以排第三，叫何秀蘭毋須離隊，搞到佢鬼咁唔好意思喎。
傳真︰2623-9278
電郵︰
