大使向來都收到唔少善長親筆寫上慰問信或者心意卡，託大使轉交畀病卧中的患者或者身處逆境嘅貧窮家庭。不過，噚日大使就收到一封比較特別嘅來信，原來大使嘅報道竟然成為一個培訓營嘅教材。
話說一班社工同中學老師喺訓練營內學習乜嘢叫「抗逆力」，佢哋要喺報章上揀一啲感動嘅新聞報道，然後寫信鼓勵同埋安慰當中嘅苦主，希望佢哋在逆境中振作。
阿梅嘅老公失業多月，𠵱家同三個細路靠綜援金過活，生活貧窮，早排蘋果基金透過「兒童圖書送禮行動」送贈益智圖書畀佢哋，其中老師們就寫咗一封信畀阿梅嘅家人，信件部份內容節錄如下，「……祝福你的孩子成為未來社會有用的人……書中自有黃金屋，鼓勵支持你的子女學習。」
阿梅得悉老師嘅來信之後，覺得好驚喜，除咗感激大家嘅關懷、支持之外，重同大使講希望仔女將來讀好書，去幫番社會上有需要嘅人，回饋社會。
大使覺得善長與苦主素未謀面，除咗可以透過捐錢幫助佢哋度過經濟難關之外，其實，善長嘅一句問候、一番鼓勵說話，往往亦成為苦主嘅一份支持，令佢哋喺逆境中唔會感到孤單，感受到人間溫暖。若果你想給予苦主鼓勵，可以寫信嚟蘋果基金，然後等大使轉交畀有關苦主，地址：將軍澳工業邨西駿盈街八號，蘋果基金愛心大使收，信封面記得註明有關嘅個案編號。
暖流熱線
電話：29908688
傳真：23702192
電郵：
網址：