巴塞隆拿嘅朗拿甸奴，喺前晚西甲聯學似亨利咁，將對方門將準備開出嘅龍門球整走，結果人哋就冇事，佢就做咗「紅牌烈士」，如果打唔甩，禮拜三場補賽作客貝迪斯佢就要停賽。
亨利早前對布力般時，曾經用腳「偷」走布隊門將費度準備開出嘅龍門球，重射入空門；結果球證判無效，但冇畀牌警告亨利。
唔知朗拿甸奴及亨利兩位同屬某運動品牌代言人嘅球星，最近係咪係活動上碰過頭交流心得，前晚朗拿甸奴就喺西甲聯用頭頂走華拉度列門將比沙利手上皮球，再射空門；但呢次球證就向佢出示黃牌，而佢重累積夠兩面被趕咗出場，真係好學唔學囉！
米禾爾對喺英足總盃決賽只分到二萬一千張門票，不滿比曼聯分少七千張。但我求大俠認為，佢哋真正要關心嘅唔係門票，而係前途；最近佢哋喺英甲跌watt，隨時連升班附加賽都冇份；如果佢哋下屆升上英超，收入比踢場英足總決賽多好多倍，不如上下一心踢好餘下嘅英甲好過。
龍門費爾嘅經理人披恩話費爾𠵱家同七間球會斟緊過檔，其中有三間重係英超球會。計我求大俠話，九成係費爾見阿仙奴想斟龍門，即刻枱高身價，等對方打佢主意；查實呢位法國仔，喺帕爾馬嘅表現唔算突出，把關技術亦一般，我求大俠好質疑究竟係咪真係有七間球會斟緊佢。
意甲榜首隊AC米蘭同德甲榜首隊雲達不來梅前晚同靠遲嚟嘅十二碼，贏安玻里同埋法蘭克福。但有人話AC球十二碼係球證送，事關湯馬臣有插水之嫌兼同兩個AC球員一早越位；AC之前迫和基禾爾二比二，追和嗰球係喺補時七分鐘入，唔怪得啲人話球證偏幫AC啦！
阿仙奴前鋒亨利如果攞到今屆英超聯同歐洲金靴獎，我哋中國人亦應記一功；事關我求大俠收到風，話亨利為咗醫好佢嘅背傷，於是走去睇骨科，做啲推拿同針灸等治療，聽效果重幾好㖭。唔係我求大俠買花讚花香，中國雖然重係發展中國家，但有啲嘢分分鐘重叻過西方大國。