特區高官民望長期低迷，民間對政府信心奇低，不過又唔可以一竹篙打一船人，原來政府裏面都有一個部門，認受性高得好緊要，呢個部門就係天文台。
雖則天文台逢親打風落雨都俾人批鬥，家長同上班一族就鬧得最多，但係據佢哋做嘅民意調查顯示，上年十月市民對天文台嘅滿意程度高達八成。
天文台長林超英噚日透過大氣電波，話市民認為天文台天氣預測準確率高達百分之八十點二，係有調查以來最高嘅。調查由一九八九年第一次進行，當時嘅結果係百分之七十二至七十四。不過咁，林超英話預測雨量好講運氣，尤其係紅雨黑雨，同一個人喺三十呎外放飛鏢一樣咁難。吓？咁以後重信唔信你好？
傳真︰2623-9278
電郵︰