呢排演唱會興懷舊，好多老牌歌手都搶閘開騷搵錢，前晚許冠英、張武孝（大AL）、呂珊、方伊琪、李龍基同彭健新等，喺紅館舉行「至尊金曲聲雅廊ENCORE演唱會」，連俾TVB炒咗魷嘅梁思浩，都去捧場趁機搶鏡。
因為今次演唱會嘅贊助商請咗梁思浩做代言人，所以叫埋佢去睇騷，當大AL獻唱時，梁思浩喺台下獻咗支花畀佢，大AL笑住話：「乜得一支咁孤寒㗎！」梁思浩就搶咪話：「俾人炒咗係咁上下啦！」
聽到觀眾嘅笑聲，梁思浩就乘勢擒上台講：「啲人覺得好奇怪，我同大AL有乜關係？其實見到大AL未必見到梁思浩，見到TVB就一定見唔到梁思浩！」
梁思浩講完唔願走，重霸埋時間唱多兩句歌先，搞到大AL只可以企埋一邊陪笑，馮仁昭都戥佢慘。前晚梁思浩無喇喇上台表演，加上班前輩太長氣，搞到成個騷超時，惟有臨時取消畀觀眾點唱嘅環節。
久未露面嘅歌手彭海桐噚日同佢嘅製作人老公周初晨，一齊去睇吳浩康喺西九龍中心舉行嘅小型音樂會。彭海桐自從被人發現係非法勞工之後，就好耐冇蒲頭，不過佢未有因之前嘅新聞而退縮，搞掂身份後諗住再戰樂壇，𠵱家佢錄緊碟，重由佢老公親自製作㖭，馮仁昭都戥佢幸福！
台灣名主持吳宗憲同嚴淑明傳緋聞，噚日吳宗憲公開話嚴淑明唔係自己鍾意嗰類型，至於話佢同嚴淑明喺澳門種情根，就更加冇可能，因為佢喺澳門嗰段時間，嚴淑明喺香港，吳宗憲又話同嚴淑明私底下冇約會過，都唔明點解會有咁嘅傳聞喎！
那英前年喺瀋陽控告盜版商獲賠約十四萬一千港元，內地嘅《瀋陽今報》報道指，那英再以每小時約二千四百港元，請咗兩位律師查盜版，佢哋噚日喺南京發現一張盜版碟，封面印住那英個名同相，碟名叫《願賭服輸──那英成名金曲珍藏版》，於是那英即刻報公安拉人，要求賠償約五十七萬港元。
陳煒、鮑起靜及吳廷燁等噚日去藍田，宣傳亞視劇集《媽媽我真的愛你》。陳煒話本來攞晒復活節假，諗住去北海道旅行，點知公司派佢去內地拍旅遊節目，咁佢就乘機約埋《媽》劇成班演員一齊去九寨溝玩，馮仁昭都覺得佢真係識得享受人生。
