喺大道中行街之際，突然有人迎面行埋嚟，左丁山一閃，來人話：「認唔認得我呀，老細？」咦，聽把聲就知道係舊朋友，但個樣就認唔出噃；來人即刻接住講：「我係印刷L呀，十幾年前你成日幫襯我哋，重一齊去日本睇機器㖭。」一講就記得，十幾年前同印刷L經常接頭，不過左丁山轉行之後，已經冇見佢好耐咯。
印刷L話：「我都被迫轉行。中國經濟太好，我反而冇行，因為日本總公司撤銷咗國際出口部，於是香港分公司都執埋，我惟有另謀低就啦！」印刷L間公司二十幾年前就以自動排版機著名，做分類廣告最啱，日本製造，質量可靠，服務又好，不過自從PC盛行，蘋果當道之後，北大方正等等搶晒市場，佢哋反為冇晒香港生意。但記得大陸買好多機嘅喎，點解會散咗？印刷L話：「你有所不知，我當初跑大陸，打開市場，頭幾年生意多到做唔切，但之後嘅訂單就一路縮，我走勻好多省市，卒之搵到理由，原來有啲買家專係買我哋嘅機器同軟件，唔係用嘅，只係用來拆，拆晒再裝番，呢啲叫做reverseengineering，偷師抄技術也。內地啲工程師好叻，不出幾年，大陸就出到一啲一樣款，平好多嘅排版機器出嚟，我哋冇晒生意。日本大老闆一怒之下，將國際部收檔，閂埋門只做日本生意，唔畀任何新款機種出口。於是我都冇咗個香港分社嘅總經理職位！」
聽落好值得同情。日本五十年代便是如此這般抄美國機器、電器，卒之搶晒美國電器製造業市場，四十幾年後，中國照辦煮碗，呢勻輪到日本廠商紮紮跳，印刷L唔好彩，變成被殃及的池魚。