向來以強化改裝平治汽車而聞名於世嘅AMG，繼為新款C-Class及SLK開篷跑車推出強化版本後，到最近又宣布響今年年中，為SL車系推出至Top嘅SL65AMG高性能開篷跑車。
記者：鄭達基
新車配以一台容積高達6.0公升嘅V12Biturbo引擎作動力核心，馬力輸出高達612匹，扭力輸出數值亦高達102.0kgm/2000-4000rpm，輔以一套AMGSpeedshift嘅5前速半自動波箱，起步加速反應敏捷，0至100公里加速僅為4.2秒，而極速更可高達250km/h（有限制）！
另外，廠方又為新車安排一套經過強化嘅跑車懸掛組合，加上ABC等電子系統，以及19吋高性能輪胎組合輔助，高速行車時亦見穩定；而四輪高效能碟式制動，亦大大增強部車嘅制動效能。
新車外表換上一套19吋AMG跑車合金胎軨、雙出式AMG跑車尾喉，車身兩旁都貼有V12biturbo字樣，車廂內備有高級真皮跑車桶椅外，重有刻度為350km/h及印有V12biturbo字樣嘅跑車表板，同埋齊全嘅車廂配備啦！