今日開倉：
卡通精品特賣$28維尼熊手表震撼全城

今期由維尼熊帶兵率領的卡通精品開倉，搶手貨除了有各款造型的毛公仔外，重有實用家品，我認為最正係超過三十款Cutie手表同掛牆鐘，款款都咁「卡娃兒」，今個復活節假期，你又可以買餐飽喇！

記者：尹珊珊　攝影：黃子偉
模特兒：Summer、Karen（RichStrategy）

超筍鐘表部

維尼熊手表隻隻$28
樣子忠厚的維尼熊可謂「女人殺手」，不嬲都有勁多女Fans捧場，𠵱家所有印上維尼熊同佢班老友記嘜頭的手表，無論係皮帶或膠帶款都只售$28，送禮或自用都絕對抵買。
街價：$75-$99　開倉價：$28/隻

同場加映Cutie少女表
開倉期間除了有維尼熊、米奇、叮噹、翠兒等卡通人物表外，另備有多款少女手表可選，每隻都是一律$28，重有埋防水功能，買多幾隻用嚟襯衫用都抵。
街價：$75-$99　開倉價：$28/隻

卡通掛牆鐘一律$39
貴為最受歡迎的卡通人物，就連老闆都話維尼熊精品最快俾人掃清光，好似呢兩款維尼熊掛牆鐘，款式甚為少見，𠵱家重減至$39一個，預計會成為必搶貨品。
街價：$85-$199　開倉價：$39/款

維尼熊家品部

半價買維尼熊煮食煲
呢個印上維尼熊嘜頭的煮食煲，開倉價低至五折，用來煮即食麵就最合適不過，共有長柄同耳仔柄兩款。
街價：$99　開倉價：$45

木製首飾盒夠精緻
女孩子最鍾意買埋一大堆飾物，當然需要買番個首飾盒好好擺放，呢兩款維尼熊木製首飾盒，有三櫃桶款同鏡盒可選。
街價：$99　開倉價：$49/個

兒童餐具8蚊任揀
專為小朋友而設的膠製維尼熊餐具，有多款杯仔、碗仔、碟仔可選，開倉價每件8蚊雞，重平過十蚊店。
街價：$18-$22　開倉價：$8/件$30/5件

兒童雨傘買定過雨季
在雨季來臨前，不妨趁機幫小朋友買定把卡通雨傘返學，呢款維尼熊雨傘，男女都啱用。
街價：$65　開倉價：$28

玩具及精品部

3呎毛公仔一百蚊有找
全場所有大大隻、身高足有3呎的毛公仔，無論係米奇、美妮定係維尼熊，每隻都可以用唔使一百元的開倉價帶佢返屋企，而且單是米奇都已經有多種造型可選，抱住嚟瞓覺最啱。
街價：$380　開倉價：$98/隻

米奇積木公仔四肢任扭
呢四隻BabyMickey系列的積木公仔，每隻約有7吋高，特別在於公仔身好似成粒積木咁，四肢重可以任人扭動擺Pose，夠晒鬼馬。
街價：$55　開倉價：$29/隻

水手Look維尼熊迎仲夏
造型變化多端的維尼熊，今趟聯同一班老友記以水手Look登場，認真「卡娃兒」呢！
街價：$50　開倉價：$20/隻

卡通公仔開倉
日期及時間：即日起至4月30日（中午12時至晚上7時半）
地址：觀塘開源道73號業發工業大廈第二期6樓G11號舖
電話：24122823