有去開日本旅行嘅香港人都知，四月呢個時間，梗要去睇櫻花啦！佢哋重興進行叫「花見」嘅活動，即係喺櫻花樹下擺地攤，唱吓歌食吓飯糰又一日㗎啦！
為咗「應節」，堂本剛主持嘅節目《講真堂本剛好慘！》最新一集，就同嘉賓內山理名去拍拖兼「花見」。玩到興起兼兩杯到肚，內山同剛仔重戴埋啲爆笑櫻花飾物上頭，騎呢開嘅剛仔就冇所謂啫，內山就慘啲啦！
記得有人問過我羅拉，點解樣貌普通過唔普通嘅內山，都可以做到女主角。聽講除咗佢演技幾得之外，重出名煮得一手好菜。今次內山客串剛仔節目，都好有禮咁做定十幾個工作人員食嘅飯糰嚟，一副好老婆咁話：「我整咗飯糰嚟呀！」而正當鏡頭前嘅剛仔一路食一路讚：「正！正！」點知竟然又爆句：「係咪噚晚剩番啲飯嚟㗎！」真係大煞風景！
另外，剛仔前日出席新劇《倫理劇》嘅記招，大班演員喺台上送咗個大蛋糕畀佢慶祝生日，剛仔當堂冧晒啦，重一口氣吹熄晒啲蠟燭㖭。