異地情緣嘅故事題材，真係可以用拍到濫嚟形容！不過今個星期3區DVD新返嘅《迷失東京》，真係拍得有啲料到。身處異鄉為異客，一對面處人生交叉點、迷失國度嘅已婚男女，兩人關係曖曖昧昧、若即若離，平平淡淡中又顯現出現代男歡女愛嘅新睇法；難得在兩人雖冇肉體關係，但觀者又感受到佢哋從「心靈」上偷情嘅快感。一段異地情，內裏卻包含了你、我、她的影子！
記者：朱崇德
《迷失東京》係近期人氣電影，2月份戲院上畫，新年檔期票房反應唔錯，剛落畫個零月又話出3區DVD；《迷》早前已獲得最佳電影、最佳男主角及最佳劇本3項金球獎，而且在剛頒發的奧斯卡金像獎，更贏得了最佳原著劇本獎項，今次都可算係夾着威勢，載譽而歸！
故事由兩個身在東京的美國人展開，一個中年過氣電視廣告明星卜（標梅利飾），一個嫁夫隨夫嘅新婚少婦莎洛（絲嘉莉鍾安遜飾），身處異鄉，面對陌生的人和事，感到不惑及迷茫。二人同度失眠夜，午夜徘徊時遇上，自此建立了一段微妙的友誼，在言語不通的國度裏，同於東京冒險，加入日本人夜夜笙歌的狂歡，在異鄉領略到生存的新狀態。
看畢全劇都冇乜激烈鏡頭，不過反增了這段異地情緣的真實感覺。據知全套戲用了27日時間拍攝，從美國帶去的工作人員只有7名，其餘的工作助手都是從日本找來，言語不通、文化背景不同，可能就是由此拍出全劇的真實感覺。
睇過《迷》的人都愛死呢段「床戲」，兩個人先飲Sake到半醉，然後一齊上床，男嘅講人到中年嘅迷惑，女嘅講年輕人的迷茫，對話中不少精妙語句；兩顆寂寞的心，大家一定諗住之後一定激戰連場，但係導演相反做到點到即止，問過好多男影迷都話恨得牙癢癢，女影迷就話從精神上兩人已經可算是偷情！
今次《迷失東京》Bonus都算落得幾足，基本同1區美版內容冇乜分別，不過最撚手係全配中文字幕，須知現時好多超級大片都冇呢樣服務㗎！抵讚！
DVD版一向睇得足過戲院版，今次又係一例；劇中有一段講卜上日本電視台人氣節目Matthew掇BestHitTV，戲院版只是曇花一現，Bonus部份有完全版睇！都好日本電視賤格Feel。
好多人睇完《迷》後，對裏面嘅理念都半明不解，想得到第一手解讀，就必睇標梅利同導演蘇菲亞哥普拉獨家剖白，咁就真相大白啦！
女主角絲嘉莉鍾安遜真係勁索，Bonus部份特別剪輯咗佢一啲逛街Shot，配埋KevinShields《CityGirl》主題純音樂做咗首MV，絲迷必睇！
DVDPRO
電話：23326326
地址：旺角奶路臣街6E德發商場地庫B4舖
