古天樂去年拍完一部以鹹書大亨為題材的電影《豪情》後，開始對出版事業很感興趣，躊躇滿志與幾位友人合作搞自由行雜誌，結果經營了半年，以賠本百萬收場，不過對做生意仍然躍躍欲試的古仔，又與另一批時裝界好友合作在內地做服裝生意及投資拍戲。
藝人做生意甚少有成功例子，但古仔卻反而舉了幾個成功的例子說：「苗僑偉做眼鏡生意唔係好成功咩？張玉珊搞修身堂重上埋市，之前我搞自由行雜誌雖然係失敗咗，但我喺辦雜誌呢段時間都學到好多嘢，我相信做生意一定要親力親為先掂。」
今年三十三歲的古仔心口有個「勇」字，縱使有不少朋友苦口婆心勸他，但他還是堅持，古仔說：「我好明白做生意會有蝕本同風險，做生意志在學嘢，𠵱家我重後生，輸得起，所以我好想趁年輕試吓做唔同嘅嘢。」
古仔最近正籌拍一部低成本電影，該片由鄧一君執導，他說：「一君對製作電影好有誠意，所以我決定掟一百萬出嚟，畀佢搵一班演藝學院嘅學生一齊製作呢部戲，一來可以培育新人，二來畀機會自己多啲機會接觸年輕人，自己同時代觸覺都會好啲。」
平時見古仔好cool，但其實他做人很心軟，朋友問他借錢，他甚少拒絕，現時古仔身邊就有四個助手，不知內情者，還以為他耍派場，他說：「基本上有一個司機同一個助手就夠，但嗰陣個司機停咗牌，咁咪請個臨時司機頂住，到舊司機復牌，兩個都炒唔落，早幾個月幫過我嘅舊助手話搵唔到嘢做，想返嚟幫我，咁我負擔到咪請佢囉！」古仔對朋友可謂認真豪爽。
幾個月前有編劇朋友送了一本俄國戲劇大師史坦尼斯拉夫斯基（ConstantinStanislavsky）著作《演員的自我修養》給古仔，希望能幫到他。
古仔說：「本書講咗好多演戲理論，睇呢本書好花神，需要時間去消化，我都唔知到再拍新戲時，自己可唔可以實踐到部書所寫嘅理論，我相信拍戲會係我終身職業，但演技幾時可以得到大家嘅認同，我都唔知道。」
撰文：陳月媚 攝影：仇志德
場地提供：CafeInn
