古天樂以往甚愛蒲，但他有見雙親及自己的身體均出現問題，打算洗心革面，脫離夜生活之列，近來接廣告賺到盤滿缽滿的他更坦言要學做生意，買大屋結婚，只是欠缺對象。
古天樂以前一向愛蒲，經常出入酒吧或去卡拉OK，但他近年幾乎絕迹於此類場所，古仔解釋說：「個人大咗，知道成日去呢啲地方冇乜謂，同埋我個胃成日痛，醫生叫我戒酒，咁去呢啲地方唔飲得酒，重去嚟做乜？講真以前覺得飲酒可以減壓同消愁，但其實係唔得嘅，酒醒之後，件事咪一樣未解決？不過，鍾意蒲吧同屋企環境太細好有關係，以前同細佬一間房，冇私人空間，但𠵱家四個人住三千呎地方，我就好鍾意留喺屋企煲碟或打吓機。」
古仔最近與父母一齊做全身檢查後，發現父親聽覺有問題，母親有痛風症，他就膽固醇偏高，古仔說：「可能因為我偏食，營養唔均衡，所以醫生叫我唔好食咁多消夜。我得閒唔使開工咪陪媽咪游水囉，兩個月以嚟，我足足瘦咗十磅。」
古仔曾與郭羨妮拍無綫劇集《尋秦記》而傳出緋聞，拍戲時又不止一次與鄭秀文傳緋聞，緋聞不絕的古仔一向不喜歡公開談論感情事，但最近他卻希望再換面積較大的獨立房子，並坦言要為將來結婚要生兒育女做好準備，古仔說：「唔好誤會我好快要結婚，𠵱家我重未有結婚對象，不過我諗住細佬同我遲早要結婚，因為我好鍾意小朋友，咁咪諗住搵到好啲嘅地方就換屋囉！」
外形俊俏的古仔今年一口氣接了鬚刨、數碼相機及按摩椅等大牌子廣告，要換大屋自然沒問題，但當談到找結婚對象時，他卻大吐苦水說：「呢個世界你揀人、人揀你！可能以前個底太花，就算𠵱家修咗心，依然畀唔到安全感個女仔。好似最近碧咸因為老婆成日唔喺身邊，傳出佢同個女助手有染嘅新聞，雖然我唔係咁信碧咸會咁做，就算係，我會幾同情佢，個伴成日唔喺身邊，外間又咁多引誘，點忍呀？所以將來我結咗婚，都唔想工作太忙冷落嬌妻。」
