鄭希怡（Yumiko）前晚舉行音樂會，表現風騷入骨，除衣着性感露底兼甩bra帶外，又公然在台上與吳浩康打情罵俏，並與Boy'Z的Kenny大跳辣身舞，引來歌迷瘋狂尖叫。
鄭希怡前晚在九龍灣展貿舉行「星Mobile潮爆舞林大派對」，請來吳浩康（Deep）與Boy'Z出任表演嘉賓，Yumiko穿上性感小背心，露出肚臍及桃紅色底褲邊，勁歌熱舞期間又甩bra帶，意姿撩人，連Boy'Z的Kenny也忍不住上前與她大跳辣身舞。
當Yumiko與阿Deep分別帶領歌迷玩排舞遊戲時，她看見阿Deep拖着女歌迷的手，便嬌嗲地說：「你做乜拖佢隻手呀？」阿Deep作狀溫柔地回答：「你唔好咁啦，返屋企先講啦，儍豬。」Yumiko其後更暱稱阿Deep作「吳好香」，對此主持忍不住說：「嚴禁在台上打情罵俏。」雖然Yumiko演出落力，但由於不少環節都找歌迷上台玩排舞，令部份歌迷在台下忍不住大叫：「好悶呀！」
事後阿Deep提到與Yumiko打情罵俏一事時說：「我成日俾人話講嘢粗聲粗氣，我想搞好啲氣氛，咪斯文啲囉。」問他會否如碧咸一樣傳短訊給Yumiko，阿Deep即詐儍說：「乜事呀？我只睇新聞版，我唔知發生乜事喎。」Yumiko得悉自己露底時，即迴避話題反問說：「我有冇瘦到呀？我之前做手術洩咗度氣，𠵱家要跑步練氣，我重有啲流鼻水㖭呀。」
張國榮生前的助手Kenneth稍後將加入英皇，成為Boy'Z的助手，對此Steven說：「我哋都係啱啱知，平時Kenny負責幫我做形象設計買埋衫，佢係保母，又係stylist，又係我表哥，Kenneth識設計，有佢幫埋手揀衫都好。」Kenny聞語即說：「我係你契哥呀。」
此外，Yumiko昨日出席在大埔舉行的公開活動，與在場一班小朋友大鬥舞技，Yumiko說：「我記得細個學芭蕾舞時，要做一字馬，重要胸口貼地，如果唔貼地，老師會坐落你背脊，痛到不得了，有時重會辛苦到喊。」
採訪：王連連
攝影：仇志德
