與財務伍講起八卦陸用公款請客，主客皆辛苦，財務伍竟然彈左丁山：「你大概掛住自己快活，唔知公家疾苦，亦都見得嘢少。呢樣我知得多過你，因工作關係，我經常與外商、外國駐港代表打交道，外商請食飯就多數去大酒店，紅酒白酒任飲。外國駐港機構用嘅係納稅人嘅錢，佢哋請食飯就麻煩到極，我都唔想畀佢哋請。但由我請嘅話，對方可能有麻煩，你知啦，德國央行行長就因為○一年除夕夜畀捷能銀行招呼住酒店，𠵱家因《明鏡》周刊踢爆，搞到周身蟻，隨時引咎辭職。故此我盡量將就。外國官方機構請客，多數有一個人頭筆值，叫餸點菜時要好克己，有一次我同一個好相熟嘅外交官講，不如大家去Starbucks飲杯咖啡、食件蛋糕算數，點知佢好嚴肅咁問我：你要大杯還是細杯，食乜蛋糕？唉，好彩我唔係同公共機構打工，否則一定俾人炒魷或者被內部調查。」
世界難撈，各國政府均有財赤之嘆，使用公帑，冇法子唔盡量小心。偏偏啲外國駐港人員唔去得茶餐廳，喜歡出入高貴地方，但揸住啲請客預算，絕對冇資格去文華扒房，真係不知如何是好。睇西方電影，外交官穿插巴黎倫敦麗斯夏蕙酒店之間，飲hightea交換消息，原來已經係南柯一夢，啲goodolddays一去不返咯。財務伍見多識廣，好同情八卦陸，叫左丁山唔好咁嘴刁，多啲體諒包涵喎。