人大常委會副秘書長喬曉陽前日喺香港開座談會，見唔到大律師公會前主席梁家傑，重特意問起梁大狀喺邊，又提起佢嘅外號「師奶殺手」，語氣親熱。不過趁假期同家人去咗度假嘅梁家傑似乎唔係咁畀面，噚日先返到香港出席《基本法》45條關注組記者會，與同一日離港嘅喬曉陽緣慳一面。
記者會上，梁大狀對釋法顯得非常勞氣，大鬧有人指鹿為馬，又話有政治強權，八方問起佢點解唔提早結束假期，趕赴喬曉陽嘅座談會，佢餘怒未消咁話，法都釋咗，重有乜用，又話若對方係嚟做騷，自己冇必要做布景板。
至於梁大狀假期去咗邊，八方有老友喺日本大阪嘅Hilton酒店見到佢。四月係日本櫻花盛開嘅時節，梁大狀認真識貨，喺日本欣賞櫻花，總好過喺香港睇人表演指鹿為馬。
傳真︰2623-9278
電郵︰