無綫噚日喺將軍澳新都城中心舉行「血薦軒轅之復活開心嘉年華」活動，汪明荃（阿姐）、楊思琦、李永豪同黃德斌等一班《血薦軒轅》嘅演員都有出席，而飾演司馬娉婷嘅內地演員楊雪重專程由北京嚟香港宣傳。
原來楊雪兩年前喺北京同林峯合作拍攝《血薦軒轅》時，已經好鬼傾慕對方，今次嚟香港，宣傳只係個藉口啫，想見林峯就真，可惜林峯因為拍劇冇出席活動，楊雪就梗係好失望啦！
楊雪用國語話：「我們分開兩年，可能他真的很忙，今晚我就要走，不知道甚麼時候再見。」唓！𠵱家女追男有幾咁出奇喎，楊雪可以主動打畀林峯㗎！但佢話：「我是個女孩子，怎麼可以打電話給男孩子，而且我的個性比較害羞。」
嘩！講到咁，唔通林峯係楊雪嘅理想對象？佢話：「他是一個不錯的男孩子，我相信他的前途會很好，會有很大的發展，做他的女朋友一定很幸福。」問佢想唔想做林峯女朋友，佢重含羞答答咁話：「那看他追不追我啦。」喂！林峯收到未呀！
早前內地名製作人張紀中曾經搵過謝霆鋒拍《神鵰俠侶》做楊過，但金庸講到明話霆鋒唔啱演楊過啲咁專情嘅角色，嗰陣霆鋒就大大聲話自己係冇期。但係噚日有網上報道就話，張紀中踢爆唔係霆鋒冇期係因為金庸同製作人及導演講到明，如果搵霆鋒拍，就唔畀佢哋拍，睇嚟金庸始終都好唔鍾意霆鋒喎！
王書麒同許秋怡前日接受港台嘅錄音訪問，許秋怡大談佢曾經患有產前抑鬱症嘅感受，重話自己唔開心到曾經想自殺，佢話：「我嘅抑鬱維持咗一個禮拜，最犀利嗰次就係鎖自己喺廁所，對住塊鏡喊，對住塊鏡同自己講嘢。都有諗過自殺，咁啱好彩支滴露得番一滴。」
蔡依林都算係台灣舞后，佢嚟緊會喺台北搞場宣傳造勢演唱會，於是特登將首新歌重新編排舞步，佢睇完《芝加哥》後，重諗到將隻舞加入新元素，成為獨創嘅「百老滙曼波舞」，到演唱會時表演。吖！唔知蔡依林幾時會睇《艷舞女郎》學埋脫衣舞呢？
薛凱琪終於出咗佢張處女細碟，佢噚日去咗港台接受訪問，話已經搵咗大班朋友去唱片舖入貨以示支持，佢重話發現有唱片舖將佢隻碟炒到百幾蚊，因為𠵱家隻特別版只係出貨幾千隻，啲人怕買唔到喎。𠵱家市道咁艱難，居然重有炒價出現，真係唔恭喜佢都唔得啦！
陳煒同鮑起靜等噚日去咗新城娛樂台接受訪問，鮑姐落敗金像獎嘅「最佳女配角」獎項，佢話：「都冇失望，有份提名都好榮幸，我都唔介意大會公開分數，玩遊戲要輸得起。」陳煒又話同鮑姐、譚倩紅同舒燕合作拍亞視劇集好開心，四個人試過喺休息時靜雞雞打麻雀。
小黑柯受良去年底喺上海猝死，有傳小黑當時係喺名模謝東娜屋企，日前謝東娜俾內地傳媒再次問到佢會唔會參加小黑嘅紀念活動，佢忽然變得情緒低落咁話：「這個我們不會再談了。」而佢嘅經理人就話謝東娜冇接到任何通知，呢件事亦搞到謝東娜好唔開心，成日喃喃自語話自己究竟做錯乜嘢喎！
