中方出到王牌，由人大釋法，暫時阻住香港政改訴求，其實最擔心嘅重係九月立會選舉，以及陳太會出選特首。
係人都知，要改變特首同立法會嘅產生辦法好困難，就算釋唔釋法，中方對特首點選出嚟永遠都有最後話事權，至於立法會，佢就更加冇得控制，依家就無端端多樣嘢煩。
八方最近同啲親中人士傾開，佢都話中方其實最緊張九月選舉，希望保住過半席位，唔好俾泛民主派控制議會，咁就有排唔得閒，所以呢次選舉真係好好睇。
另一樣，北京仍然好密切監察陳四萬嘅去向，怕佢會出選第三屆特首，同唐唐爭一日長短，陳四萬雖然已經離開特區政府，但係不時見吓報，出吓鏡，又冇停過評論時弊，最近連老董都彈埋，冇人知佢諗乜。其實，使乜咁驚吖，八百個人肉舉手機器，你一單眼，佢哋就識反應，驚，咪即是嗰八百人有獨立嘅見解？
傳真︰2623-9278
電郵︰