喬曉陽、李飛同徐澤受到胡溫曾吳四人所託親自飛嚟香港釋法，又放下身段肯同啲「賣國賊」、「小丑」同「反中亂港」嘅議員座談，（其實係你要聽我講，你問我未必答），就睇到中央真係非常重視釋法呢單嘢，簡直係軟硬兼施，許勝不許敗，務必要港人心服口服，支持釋法為止。
八方聽聞，中央今次首要嘅目標係湯家驊，李柱銘、余若薇、梁家傑、吳靄儀同埋陳景生等大狀，因為知道佢哋最包拗頸，打慣官司唔輸得，而且係港人良心，有影響力，所以特別開一場招呼佢哋；至於班學者同政客，就容易話為好多，認「萬不得已先出手」，兩下就搞掂。
有人就話中央今次咁低聲下氣，不厭其煩，皆因佢哋心知理虧，講穿就係一招「明修棧道、暗渡陳倉」，一招「先斬後奏、米已成炊」，正如班大狀講，釋法咁大件事都唔預先張揚，問吓受影響嘅七百萬人有冇意見，十二日就搞掂晒，效率簡直神速，如果唔係怕大部份熱愛民主同好醒目嘅香港人有不同嘅意見，使乜咁鬼神秘，要黑箱作業，𠵱家「唔錯都錯咗、唔釋都釋咗」，咪全力補鑊，𠱁香港人接受囉。
所以話共產黨好戲，純情嘅港人邊有得揮呀，之前派曾憲梓、鄔維庸、王敏剛、李祖澤同安民出嚟亂咁鬧人，只不過係煙幕，「項莊舞劍，意在沛公」，你諗得出嘅四字成語都啱用。
八方噚日撞到早前否認有份聯署要求人大釋法嘅劉佩瓊，佢話啲人大邊有咁叻叫中央解「如有需要」四個字，頂晒都係話二○○七年以後唔多清楚，請中央出手，言下之意，佢都有啲不齒大學教授薛鳳旋出嚟邀功認叻嘅行為。
劉人大都係大學教書做研究，所以佢話都唔可以講嘢唔準確，好似有外國傳媒訪問佢阿姐講釋法，佢都唔好意思話無變，只好認係加咗啲嘢。劉教授話，佢都算同喬老爺熟，（八方按，第一個叫喬副秘書長做老爺嘅係李祖澤，但係原來「喬老爺」呢個係當年毛澤東對中共黨內才子、外長喬冠華嘅親密稱呼，喬後嚟都難逃被老毛一批），劉人大形容喬老為人風趣，好似上次喺深圳見班人大政協，開緊會喬老爺忽然話，佢如有需要吸煙，大家有冇意見，搞到大家鬼咁開心，話梗係冇問題。
咁講，喬老爺的確有京官嘅派頭，雖然第一晚改份講稿搞到天光四點冇得瞓，中午又冇得午睡，但係佢答馮檢基提問時不忘幽佢一默，話喺電視見到阿基以向老婆五次求婚嘅精神嚟求見佢，反映釋法意見好感動，重多句口估人哋馮太當時只有阿基一個人追。八方一聽到佢咁講，都知大鑊，喬老爺同安民一樣，有點得意忘了形，今次事小，因為老爺只係將自己嘅快樂建築係阿基一個人嘅痛苦之上，阿基返到屋企，平時好賢淑嘅馮太都免不了講一句，「以後唔好將我哋嘅浪漫史用呢做比喻！」之後有冇俾老婆大人扭耳仔罰頂痰盂八方就唔知，阿基話以後都唔敢亂講，咁又好難怪阿基嘅，邊個諗到喬老爺會當眾講私事。
講開打比喻，喬老爺真係有啲愈比愈胡塗，佢喺北京話釋法等於1+1=1，搞到好多人都𢱑晒頭，實在係一個連數學奇才陳景潤都搞唔掂嘅難題，佢喺香港就改用打手印作比喻，話乜嘢第一次唔清楚，再大力按第二次就會清楚啲，點知李柱銘就話佢唔知係咪未打個手指模，第一個唔清，再喺上面打多個，只會愈嚟愈模糊，