於早前舉行嘅「鈴木2004型格小車同樂日」，場面可謂十分熱鬧，事關當日集合咗超過100位小車Fans，其中重包括HKWagonRClub及KeiClubHK嘅車主；與此同時，場內重有兩部經過代理方面，悉心裝身扮靚嘅特別版WagonR+及KeiWorks，亦惹來不少車迷注視㗎！
同樂日嘅重頭戲，就係由各車主親身上陣，駕駛KeiWorks及WagonR+參與遊戲；其中響前者嘅遊戲中，車主必須經過多個特別排列嘅雪糕筒，以時間最快者取勝，假若於比賽中犯規，例如碰跌雪糕筒、再啟動引擎及無轉波的話都會被扣分。故此若不小心駕駛，即使時間有幾快，都可能被扣去全部底分，因快得慢。
至於駕駛WagonR+嘅遊戲，則發揮車內座椅靈活多變嘅特性；遊戲設有指定路線及範圍，參加者必須在兩程之內運載所有指定物件來回起點，當中更不乏一啲大型物件。要響最短時間內完成任務，其實都好考驗車主嘅心思同駕駛速度呢！
除一眾遊戲參加者玩得開心外，場地兩邊不同組別嘅支持者亦不時發出尖叫同歡呼聲，為參加者打氣，場面認真熱鬧；最後評判響兩個組別中，選出兩位優勝者及一位安全駕駛獎得主，各得到精美嘅原廠禮物，隨後大家重來一張大合照，並開始享用一頓豐富美味嘅燒烤自助餐㖭！
記者：陳偉林