塔倫天奴殺得性起
動畫奧瑪超暴力

荷李活電影鬼才昆頓塔倫天奴（QuentinTarantino）套《標殺令》，都係唔少影迷近年最鍾意嘅動作Cult片，大家期待嘅下集《標殺令2》，前日已經喺洛杉磯舉行首映禮。女主角奧瑪花曼（UmaThurman）前日同拍檔劉玉玲、戴露漢娜（DarylHannah），都以性感打扮出現為套戲造勢。
每次出嚟宣傳《標殺令》都着得好性感嘅奧瑪花曼，前日就着咗一條好薄嘅紫色裙出現，不經意間重凸埋點㖭。而有份喺片中演出嘅漢娜同劉玉玲亦唔輸蝕，着晒低胸晚裝赴會，展示搶眼嘅酥胸。

DVD狂送禮品
導演塔倫天奴話好滿意自己拍嘅《標殺令》上、下兩集，佢重嫌玩得唔夠喉，正計劃以動畫製作《標》片前後篇，重話會玩得更加暴力。而《標殺令》嘅DVD已經陸續喺世界各地推出，日本嘅限量boxset版重加送特別版Be@rbrick公仔、一比十嘅日本刀模型同奧瑪喺片中着過嘅同款T恤，認真華麗。
塔倫天奴又話好有興趣接拍新一套占士邦電影，希望將占士邦片拍得更有style，唔好只專注搞啲嘥錢嘅爆炸場面喎。