以煲呔為首嘅政改三人組，因為要招呼以喬曉陽為首中央三人組嚟港做大騷，搞到冇覺好瞓，冇啖好食。不過，煲呔既然誇下海口喺呢幾日內交第二號報告，即係呢個復活節冇得休喇。
有人就話未必，因為份報告分分鐘只有一句話，就係「大部份聲音話行政長官同立法會嘅產生辦法要改善」，咪好快收工囉。
無論煲呔份嘢點簡單，老董都唔慌會得閒，佢嗰日見喬曉陽嘅時候大大聲聲話自己噚日起放假，但係點接煲呔個燙手山芋，我哋一向慢幾拍嘅董特首肯定要閉門度吓橋。喂，份報告要公開畀港人睇，都唔好話冇壓力噃。
嗱，如果你話乜都唔使改，七月一日上街人數肯定唔止五十萬，所以佢只可能同意要改，但係唔使大改，余若薇話最怕佢出呢招，中央重要點埋頭話OK，限死咗只可小改，○七普選就真係冇晒機會咯。老董嘅政治智慧有幾高大家都心知肚明，葉國師重叫佢把握呢個黃金機會洗底，真係同佢老人家開個大玩笑。
傳真︰2623-9278
電郵︰