長假前個市淡靜，指數微跌，恒指成份股變化好平均，11隻跌，13隻升，9隻冇郁。啲4月份到期嘅藍籌Call輪，唔少散得幾淒涼吓，引證炒末日輪風險好大。
死火輪排頭位嘅係恒生Call輪9162，前日5仙，昨日3.4仙，散32%。呢隻輪上周一最低係5仙，第二日彈上15.5仙，單日升幅兩倍，當時正股（011）升2.8%。隻輪下周夠鐘，溢價0.6%，槓桿率293倍，正股若然下周初再唔升，隻輪就係咁先。
華能Call輪9196收99仙，唔見28%，正股（902）由8.65元回落到8.40元拖低。隻輪月底到期，溢價1.1%，槓桿率17倍。睇吓張走勢圖，成支箭咁，8日前喺10仙邊邊，當時正股喺7元邊邊，正股因宣布業績理想，殺上8.85元（升幅25%），隻輪就最高殺上1.62元，升幅15倍，只係用咗6日時間，未來兩周，正股仍會反覆，隻輪仍會波動。
中移動Call輪9116收9.3仙，跌26%。重有幾日買賣，溢價0.3%，槓桿率25倍。正股（941）唔會靜落埋，隻輪未必會作廢。
長實Call輪9106收12.1仙，跌19%。月底到期，槓桿率56倍，仍有5.5%溢價。博正股（001）短期內升3元，唔多實際，隻輪風險好大。同類輪9235收3.1仙，散18%，又係月底到期，行使價73.88元，溢價9.9%，槓桿率218倍。呢隻作廢機會比9106更大。
章盛