港產的「受難曲」比耶穌多活幾個時辰，同樣短壽，可以改名為「難產曲」。難產的，是香港的一國兩制，高度自治。主角人選不必似米路吉遜，但一樣有睇頭。首選主角正是唔肯現身立法會沙士聆訊而去電影金像獎頒獎禮、演技麻麻、戥人高興的董特首。只要諗吓，董特首被失憶的人大清算，指他跟中央「脫鉤」，那副可憐相，就像揹住十字架仍要投入耍太極，既滑稽又慘情。董特首被人大牽住鼻子走，鼻哥窿早已驚到冇晒肉，看他無德無能被動地依法治港到2007，蹣跚的身段，絕望空洞的眼神，實在叫全體港人受難。
第二主角人選是曾蔭權。政制三人組明明已是跛腳鴨、軟腳蝦，對政改爭論無法插嘴，只能事後做阿四解話，職責跟斟茶阿嬸無異，只是略比維園阿伯有多些少尊嚴。曾司長被架空，面容雖然痛苦扭曲，但仍能死頂，回應記者，實有潛質赤膊擔住十字架做京港拉力賽的苦情代表。高官問責制早已證實難產，責難都多餘。請為曾司長受難，係咁二同聲一哭。
梁愛詩做主角，不必反串，只要披頭散髮扮耶穌阿媽，演活難為了家嫂角色，面對質詢，一於唱「哎呀難難難……」難產的司法獨立，受難的法律條文，梁愛詩要睇人大面色，要為人治辯護，眼看普通法給釘牢在十字架上奄奄一息，露出遲來的慈母愁容的梁司長，淚眼中乾。最後的高潮戲來了，你估，她打算吻誰人的腳？