北京中央官員來港,各路人大政協當然要捧場,但亦有少數人藝高人膽大,明當喬曉陽冇到。有「上海姑爺」之稱嘅羅康瑞噚日着住佢個件永恒嘅中山裝坐車前嚟,聽咗喬曉陽一班人講完正題,就急急腳起身離座。
八方問佢點解唔聽埋問題先走?佢話自己好忙,趕住去機場搭飛機飛上海,大有叫八方唔好問咁多嘢,阻住佢玩樂之意。八八年中英就香港政改拗到面紅耳熱個陣,小羅非常投入。不過,佢𠵱家個心飛咗去上海新天地,一早回歸咗一個消費嘅祖國,對所謂兩制興趣大不如前。
佢走咗之後,吳光正亦離場,唔好以為想做第三屆特首就規定要應酬到篤,可見吳主席係把炮之人。吳光正咁忙,又真係唔坐得一個下晝咁耐,同時八方都見唔到唐唐嚟捧場。最有型嘅當然係何鴻燊,佢最早走人,重企定定喺記者前面任問唔嬲,賭王膽識過人,點會怕記者?
(圖)羅康瑞提早離開會場,話要趕住飛去上海。
資料圖片
傳真︰2623-9278
電郵︰