自從張國榮（哥哥）同羅文呢兩位巨星去世後，令佢嘅歌影迷同身邊嘅親友傷心欲絕，不過悲傷過後都總要起番身，好似羅文生前嘅助手阿東同哥哥生前嘅助手Kenneth，近日都不約而同搵咗份新工作。
自從哥哥逝世後，Kenneth都做過鄭希怡（Yumiko）同舒淇嘅形象顧問饒子懷嘅助手，又因哥哥生前同英皇娛樂嘅老闆楊受成相識多年，所以最近Kenneth決定加入英皇，喺經理人部門做保母，主力照顧啱啱出碟嘅Boy'Z同吳浩康，下個禮拜就正式返工！
Kenneth雖然照顧過哥哥呢位巨星，亦都有相關嘅工作經驗，但𠵱家唱片市道咁差，所以聽聞佢嘅人工只係一萬蚊度。
至於阿東，佢喺羅文過身後，曾話過開娛樂公司，亦都幫湯寶如接吓工作，唔知係咪入息唔穩定，早排有周刊就影到佢喺JPG時裝店做售貨員，但唔計佣金嘅話，佢嘅底薪都係得幾千蚊。
Kenneth同阿東可以收拾心情重新開始，當然係好事，所謂行行出狀元，馮仁昭都希望佢哋可以有美好嘅將來！
混血女模LisaS.噚日喺太古廣場示範Ferragamo春夏新裝，佢話本來諗住六月去南非旅行歎世界，點知俾住喺美國嘅父母催返屋企，所以要改變行程，先返美國一轉。問Lisa.S會唔會帶男友返屋企見家長？佢話：「我會帶我隻芝娃娃狗女去就真，佢好嗲我㗎，見少陣都唔得。」唔知佢緋聞男友吳彥祖聽到呢番話後，會唔會傷心呢？
周華健嘅爸爸本周日嚟香港探親時突然因病逝世，享年六十八歲。華健當時正喺日本做嘢，佢接到消息就即時趕嚟香港見爸爸最後一面，佢日前話：「阿爸臨終吩咐我哋，佢嘅喪禮唔可以鋪張，呢個月二十號喺香港殯儀館出殯，之後會安葬喺深圳。」華健因為要處理爸爸嘅喪事，所以暫時取消工作。
徐子淇同洪天明呢對舊情人噚日喺將軍澳電視廣播城一同亮相節目《KeepFit新「型」類》，佢哋重好大方咁合照。而徐子淇着住透視裝大騷身材，問洪天明覺唔覺得徐子淇靚咗？佢話：「梗係靚喇！瘦咗好多，豐唔豐滿我就唔知。」我馮仁昭都好好奇，佢哋會唔會有復合機會呢？
陳文媛（BoBo）、何韻詩同Cookies嘅Theresa日前行街俾傳媒影咗相，BoBo重俾人話係電燈膽。佢噚日去港台做訪問時話：「我哋間中都會一齊行街，但唔知點解佢哋會俾人傳同性戀，其實我哋嗰日俾人影相都冇避忌，但突然有人跳出嚟，有啲嚇親啫。」不過BoBo係陳冠希嘅緋聞女友，點都唔會被傳同性戀啦！
林曉峰同查小欣噚日喺商台主持節目時，講到近期紅透美國嘅孔慶翔啱啱推出咗處男大碟，查小欣話聽過佢首歌之後覺得冇乜嘢，只不過好似一個普通人唱卡拉OK咁五音不全，但林曉峰就認真唔客氣咁話人哋唔知醜。雖然孔慶翔嘅歌藝好多人都唔接受，但馮仁昭覺得唔使踩到咁盡囉！
由謝霆鋒同張栢芝等主演嘅電影《無極》開拍以嚟，一直都幾多是非，近日又有報道話有兩個記者混入去做卧底演員，結果被揪出，最終梗係被炒魷啦！
原來劇組都係喺傳媒度得知有內鬼，於是展開調查，果然喺兩個身穿厚厚盔甲戲服嘅演員身上搜出相機。真係無所不用其極！
