黎明昨日以「第二十八屆香港國際電影節」的榮譽大使身份，與日本女星、有CM女王之稱的田中麗奈一同宣傳電影。黎明表示會一盡地主之誼招呼麗奈吃中國菜，他說因已不用擔心禽流感，故會帶她品嘗北京填鴨。
黎明、日本女星田中麗奈和導演行定勳等，昨日在尖沙嘴出席「第二十八屆香港國際電影節」的活動，麗奈此行主要宣傳其主演的電影《日出前向青春告別》。
麗奈穿上露背裝出席活動，豔光四射，而黎明則以「榮譽大使」身份頒發紀念品。黎明表示會一盡地主之誼招呼麗奈食中國菜，他說：「𠵱家唔怕禽流感，我會叫隻北京填鴨畀佢歎吓。我冇準備禮物畀佢哋，所以今晚會由我請客，盡量叫份量少啲，咁佢哋可以試多啲唔同嘅菜式。」
問到黎明對麗奈的印象如何，他說：「我對田中麗奈印象唔深，不過我覺得佢好專業。」
而麗奈接受訪問時大讚黎明談吐親切和溫柔，黎明說：「你哋（指記者）問佢呢啲問題，佢都咁友善回應，稱讚係一種禮貌，唔能夠多，亦唔能夠少。」
麗奈逗留一天宣傳，今天便會離開，她表示香港的印象是來自電影《無間道》，她說：「我一落機就好似去咗《無間道》嘅地方，不過日本淨係上映咗第一集。我好鍾意陳冠希，因為佢曾嚟過日本宣傳，我哋一齊接受過訪問，大家年紀好近好投契。我呢次嚟都冇聯絡陳冠希，或者佢聽日睇報紙咪知道。」
麗奈昨午來港時，大會安排了四名保安，可是卻只有三、四名影迷接機，場面顯得冷冷清清。麗奈離開機場時一直手持影迷送的毛公仔，當麗奈抵達下榻的酒店時，她休息了一會隨即換了衣服在尖沙嘴街頭拍攝，其間吸引一些途人圍觀，但不少人從記者口中才得知她是田中麗奈。
採訪：盧幼萍、李珮洳
攝影：林德雄、陳慧安
