假期前港股例靜，港股反覆下跌10點，收報12909，成交縮至130.73億元。假後市場會否復活就比較難講，因為散戶焦點可能會轉移至五隧一橋60億元債券上，跟住輪到港府發行200億元零售債券，散戶資金唔憂冇出路。
晶門（2878）首日掛牌，竟可企穩於招股價水平之上，收1.86元，較招股價1.75元高6.3%，成交達2.31億元。華潤萬眾（331）亦開始向水面進發，收報4.475元，升4%，距離招股價4.55元只差1.7%。據聞利福國際（1212）將以中間價8.30元定價，終於唔使以下限定價咁陰功。
市場游資雖然少咗啲，但投資信心似乎穩定番，散戶可留意仍然潛水嘅中芯（981）及TOMOnline（8282）。中芯做咗大摩指數成份股後都未正式炒過，主要因為國際官司纏身，基金仍在觀望，但只要訴訟結束，不明朗因素得以消除，相信會好似國壽（2628）大幅反彈。
超人又再出手支持和記環電（757），股價彈升11%至0.61元；東燃（432）反彈更誇張，全日升26.7%，成交達9253萬元，但至今未聽到小小超入市支持股價嘅消息，但就聽聞電盈（008）及中策（235）正為減持東燃進行部署，今次東燃炒高，可能再次成為散戶陷阱。
大華國際（600）董事總經理李三元以每股0.19元悉售股權，分散賣畀多個投資者，變相讓第二大股東黃坤做大股東。不過，消息對股價影響不大，股價重一度跌破0.19元配股價，低見0.186元，看來大廚號召力不復從前。不過，配售代理時代證券密密收集，可能有動作跟尾。
阿虎