八卦陸叫食晚飯，臨時改變地點，由窩打老道改去又一城。平時同八卦陸及一班中環老友吃飯嘅話，如果輪到八卦陸請，佢一定去一啲古靈精怪，我哋班中環人好少去嘅地方，因為八卦陸話過：「你哋班人成日出入大酒店、陸羽、鏞記、海都、福記之類，不如跟我去踎吓九龍城啦。」佢選啲飯店都幾好，頂多係坐得唔舒服啫。但係貨真價實，味道唔錯，如果唔係佢帶路，我哋班中環常客就唔識去，唔敢去咯。
呢晚點解去又一城啲大路貨食店呢？原來唔係佢私人請，而係公司請，用到公款咯喎，就好有計較，要向上頭交代：（一）點解要幫襯A店？（二）每人（人頭計）筆值有幾多？（三）為乜事幹？（四）只係飲茶，紅酒白酒威水之類要詳細交代。左計右計之下，八卦陸惟有改地點，向筆值將就，再自己走去食店樓下嘅超級市場，自掏腰包買支廉價紅酒（不過佢識得揀紅酒，搵到支廉價正貨）奉客。
請客請得咁辛苦，左丁山為佢傷神之餘，亦食得唔安樂。呢間食店晚上生意麻麻，得兩成客，正點好普通，甜品糖水得個杰字，完全唔符合八卦陸嘅平時晚飯標準。左丁山食咗幾啖，返到屋企，老婆居然開夜班未返到嚟，肚仔餓餓，點好呢？惟有𡁻咗廚房裏面嘅一個將近熟透，就快爛嘅芒果，再咬一個雪梨頂肚，諗住第日再㩒八卦陸，用佢嘅私房錢請番一餐勁嘅。呢個年頭，用公款請客，最好就係去食漢堡包，起碼可以得個飽字。