新世界西半山柏道2號，上個禮拜突擊開賣，由於事出突然，聽講嗰日連樓書到唔夠派。部份買家連樓盤資料都唔清楚，就畀錢買樓，完全係97高峯期場景重演，可見豪宅樓市幾咁熾熱。
樓書連買家都冇得睇，記者當然未見過啦。發展商噚日借土瓜灣傲雲峰記者會，順手攞咗幾本樓書，派畀傳媒朋友。
新世界發展營業及市務經理黃浩賢話，一共印咗三千本，每本成本要二十幾蚊。佢話，雖然賣樓嗰陣趕唔切派畀買家，不過遲啲會補派。
都唔知係買家太心急，定係樓書印得太慢。
其實，今次柏道2號買家，唔單只無樓書睇，連示範單位與售樓處都欠奉。就算係咁，都可以一日賣晒，啲買家對個盤似乎好有信心。
樓書印刷都幾精美，買家收到後，可以慢慢研究，睇吓自己究竟買咗乜。
復活節一連四天長假期，又係商場爭奪消費者嘅時候。新地元朗廣場、柴灣新翠商場同薄扶林置富南區廣場，用漫畫人物小飛俠阿童木做招徠。
屆時重會有四十呎巨型小飛俠阿童木同大家見面。
阿童木係已故漫畫大師手塚治虫筆下《小飛俠》嘅主角，創作至今已有五十幾年，小說講佢生於二○○三年四月七日。
另外，新地屬下SignatureHomes向旗下豪宅租客募捐，收集到逾三百個禮物籃，包括有玩具、糖果等，送畀保良局兒童，令佢哋都可以歡度復活節。
賣咗超過十年嘅中山星晨花園，將會喺今個月十八號開售第八期佛羅倫斯，以抽籤方式發售首批二百一十一伙。發展商以優惠招徠，入票登記人士可免費參加睇樓團，買樓就再送現金利是兩千蚊，重可以參加抽獎，有機會贏五両金猴，似乎比香港發展商重積極散貨。
聽講現時已經收到三百幾個登記。另今次推售嘅單位，七百幾呎賣八萬八，每呎百零蚊；而一二六一呎嘅四合孖屋，連花園就盛惠二十九萬八，每呎二三六。
一連幾日嘅復活節假期今日開始，每逢節日，最開心不過就係一班小朋友。
噚日中原地產同信和集團舉行將軍澳蔚藍灣畔復活節買樓優惠記招，重搵嚟一班小朋友，粉墨登場扮復活兔，扮相可愛，啲小朋友見到朱古力復活蛋時，重愛不釋手㖭。
原來呢幾位小朋友係中原將軍澳區嘅區域營業經理李玉祥、分行經理李志江同一名代理嘅仔女，為咗促銷代理嘅樓盤，咁都算夠晒落力。
信和韓家輝見咁多小朋友助陣，重話為售樓處增添唔少溫馨氣氛，希望今個復活節假期，大家都一家大細去睇樓輕鬆吓，認真識得乘勢宣傳一番。
蘭西
電郵地址：
