𠵱家唔少藝人都靠出位新聞嚟做宣傳，好似久沉多年嘅美國歌手珍納積遜（JanetJackson），如果唔係早排發生露乳事件，恐怕佢嘅新碟《DamitaJo》聲勢都冇咁勁，𠵱家隻碟賣咗三十八萬張，重排喺銷量榜第二位㖭！
雖然珍納口口聲聲話唔想再提呢單嘢，但佢喺新歌《JustALittleWhile》嘅MV入面，繼續奉旨狂谷胸行性感，重玩自拍冧男友！
《JustALittleWhile》MV講述珍納不斷自拍家庭影帶燒成DVD-R，寄畀男友傳情，不過大家唔好以為拍HomeVideo有乜咁出奇，奇就奇在珍納自拍嘅家庭影帶，吓吓都好似做騷咁誇張！佢喺屋企都打扮到濃妝豔抹成個妖女咁，聽iPod嗰陣又興奮到周身郁，轉頭重換咗套白色套裝，喺廚房玩煮飯仔，真係同日本嘅Cosplay水着女星有得揮。
珍納喺MV入面，亦搵咗班惹火女角扮老友，呢班靚女雖然冇學JustinTimberlake咁𢱑開珍納件衫，但佢哋不停喺鏡頭前自摸谷胸鬥搶鏡，十分抵死。