昨日終於有隻新股旗開得勝，晶門科技（2878）首日掛牌收1.86元，比起招股價1.75元，高6.3%。公司同埋包銷商喺慶功宴上，必定可以開懷暢飲。
經紀黃話，晶門公開招股部份只得0.65倍超額認購，所以冇觸發回撥機制，大部份貨源落在機構投資者手上，雖然睇落唔多夠氣勢，但起碼唔怕散戶掟散股價，其實係有得有失。
另外，上市以來一直唔多覺有料到嘅力豐集團（387），噚日失驚無神炒高17.9%，收1.12元，成交金額有成859萬元，睇落唔似係乾炒。
經紀黃話都有同感，佢打探一番後收到料，據講隻股終於獲得機構投資者垂青，分分鐘可以修成正果。
究竟賣機械設備嘅力豐有乜嘢咁好？上個月力豐公布全年業績，盈利只得三千零萬銀，小初重記得隻股舊年7月上市，曾經出現匿名信事件，股價一度潛水，真係估唔到事隔幾個月，投資者觀感變化咁大，認真值得考究。
經紀黃話，聽講力豐獲得高人相助。
慕容小初