碧咸近排真係當黑，除咗被傳出去滾外，重俾西班牙傳媒狂插，認為佢要為皇家馬德里喺歐冠盃八強出局負責。
啱啱喺瑞士同老婆維多莉亞箍完煲返西班牙嘅碧咸，喺歐冠八強首回合對摩納哥時無端白事攞張黃牌，搞到踢唔到禮拜二場次回合。𠵱家皇馬輸一比三，總比數踢成五比五，俾摩納哥以作客入球優惠踢出局，西班牙啲傳媒即刻入晒碧咸數，重話係佢送張四強入場券畀摩納哥。
我求大俠覺得西班牙咁講對碧咸好唔公平，事關皇馬陣中有成6條A，少碧咸係有影響，但唔係想像中咁大；況且場波擺明輸後防，計落要孭鑊嘅，應該係希古拉同美治亞至真。老實講，若然碧咸唔係箍煲箍得咁高調，乖乖哋坐喺觀眾席幫隊友打氣，睇怕亦唔會成為代罪羔羊啩。
英甲隊米禾爾嘅澳洲中場卡希爾，過去一個禮拜都可謂嘗盡高低起跌。除咗喺足總盃成為球隊入波晉級英雄外，上周中亦喺國際賽首次代表澳洲上陣，正式成為大國腳；但前晚英甲聯補賽米禾爾對卡迪夫，佢就領紅牌被趕離場，間接令球隊失分，錯失追近前列爭升班機會！
國奧隊正積極備戰作客伊朗大戰，前日因為遇滂沱大雨，被迫取消練波，轉到室內打籃球。點知後防大將杜威因為一次上籃時，畀隊友踩咗一腳，證實左腳腳趾骨裂，要打石膏，肯定缺席伊朗大戰。以為唔使大雨中練波，可以避過受傷機會，杜威最後都避唔過呢一劫，真黑仔！
曼聯喺英足總盃四強贏咗阿仙奴後，就喺一間夜店開派對慶祝；不過，班球星冇得揸靚車去，清一色要搭由會方租返嚟嘅小巴。聽講曼聯咁做除咗想建立隊波嘅團隊精神外，重特登要佢哋辛苦一吓，等佢哋下次落場比賽時可以更醒神。曼聯喺禮拜六作客對伯明翰，睇吓呢招掂唔掂！
歐冠盃真係救番摩納哥一命，呢支法甲球隊𠵱家負債五千三百萬歐元（成五億零三百萬港紙），但係佢哋喺入咗四強後，即刻吸引到新投資者注資。另外，若然下月尾佢哋可喺史浩克球場高舉獎盃，起碼執到二千萬歐元，計埋喺嚟緊夏天賣走古利同柏素等球星，話咁易就可以還清條數。