新加坡姊妹花2R入行以來看似星途順利，但二人卻坦承來港後，因為三度賣身而曾賠上屋租及解約費，前後花掉父親數十萬元積蓄，至今仍欠父債未還。
女子組合2R去年進軍樂壇，兩姊妹Rosanne及Race在去年尾的樂壇頒獎禮上，勇奪多個新人獎項，兩人拍劇之餘又拍廣告，曝光不絕。不過知名度卻與收入不大相稱，因為2R至今還未有過一毛錢酬勞落袋。
2R的父親在星洲開設曬相連鎖店，問她們為何拒做太子女而選擇越洋當歌星？日前她們在荔枝角接受訪問時說：「爹哋本來有五間舖頭，但舊年沙士嘅時候已經執咗兩間，𠵱家啲人用數碼相機影相，都唔使曬相，所以生意同以前差好遠。」
家姐Rosanne就表示她們前後簽約給三個經理人，但首個經理人卻令她們元氣大傷，Rosanne說：「佢安排咗我哋嚟香港之後，冇幾耐走咗路，原來佢冇幫我哋交屋租，當時啲人一嚟就追我哋八個月租金，但我哋冇喺香港做過嘢，都冇錢，之後重嘥咗好多錢同佢解約，嗰時全部都係爹哋幫我哋畀錢咋。」
問Rosanne花了父親的積蓄有否數十萬港元？她點點頭說：「總之花咗好多好多錢，我哋𠵱家都未有能力還清啲錢畀爹哋，因為我哋喺香港都要生活，要交租，其實都有少少錢賺，但好多酬勞都要幾個月之後至會收到錢。」
後來2R簽約張承襄做經理人，但未幾2R又與對方解約，到去年才再簽約「名澤」經理人公司，三度賣身後總算穩定下來。2R坦承絕不做大花筒，她們說：「我哋從來唔介意被人哋話孤寒，我哋係識珍惜啫。」
採訪：朱倬誼
攝影：林德雄
服裝：Dada
化妝：Ric
