昨日是梅艷芳去世一百日，梅媽在省善真堂為愛女做法事時，再度開火指有人沒有資格做阿梅徒弟，又指治喪委員會沒一個是好人，並點名指摘施南生、許志安和何冠昌遺孀。梅媽大罵有人「攞就攞夠、搵又搵夠、呃亦呃夠」。
昨日是梅艷芳離世一百日，梅艷芳的胞兄梅啟明在九龍塘省善真堂辦法事，約花費四萬港元。梅媽昨午約二時帶同梅愛芳的兩個兒子及三名孫兒一起到達。而堂內的敬親閣擺放了梅愛芳和梅艷芳的靈位，旁邊還有一個空置的靈位，每個價錢二萬五千元。
法事期間梅媽再度炮轟阿梅一眾徒弟、友人及治喪委員會成員。對於施南生替阿梅在台灣訂做骨灰罎一事，梅媽說：「佢有佢做，我有我做，佢做咪留番畀佢自己囉！阿梅嘅骨灰暫時放喺屋企。噚日施南生重打畀我，話喺台灣幫阿梅同張國榮搞咗個庵，佢有乜嘢咁大權呀？骨灰攞返嚟又唔通知我，治喪委員會成班挑唔到兩個好人，冇個好人。」
對於許志安日前的「金錢萬惡」論，梅媽說：「佢覺得嘅咩？咁佢又收人哋七十萬一場唱四首歌？佢冇資格做阿梅徒弟，全部人都冇資格做。」
此時鄺美雲致電梅媽，梅媽又對記者說：「佢問我志蓮係咪有阿梅個位，諗住去拜吓，我都唔明點解死人骨灰都要爭，骨灰諗過擺喺志蓮，但志蓮從來冇阿梅嘅靈位，得何加男嘅位。我阿梅姓乜㗎？咁鍾意咪留番畀自己用咯，全香港都有人契乜契物，有冇人改姓呀？邊個做嘅我心中有數，時機成熟全世界都會知，佢會有報應。」
其後梅媽連阿梅契媽何冠昌遺孀亦罵，她說：「阿梅病時想食燕窩，但因為病唔食得，我煲雪耳扮燕窩畀佢食，後來阿梅唔食嘢，我打畀何太，叫佢哀求阿梅食，佢話『佢要食等佢自己煲啦』。」
梅媽續說：「我退埋啲，佢哋就行前啲，唔發火當我係病貓，生前就將阿梅搬嚟搬去，𠵱家攞就攞夠、搵又搵夠、呃亦呃夠。我乜都儲喺心度火唔火滾？官司一完我會列一張紙畀大家睇。」
而昨日一名叫朱熾齡的女仔自稱是梅媽契女，又透露本月內會與梅媽正式上契，昨日她又在堂內向梅媽斟茶。朱熾齡說：「佢兩個女都死晒，好可憐，係我主動同梅媽講上契，我之前同梅媽識但唔熟，喪禮時成日見到，阿梅出殯前，梅媽帶我睇阿梅遺容，俾劉培基阻止，我同梅媽都覺得佢只係做衫嘅，點會佢話事。」
昨日梅啟明、阿梅好友蘇小姐、林國斌、杜貞貞及數十位fans先後到場，阿梅最小的姪仔一邊摺元寶一邊說：「等我摺多啲畀姑姐。」當眾人燒衣給阿梅時，梅啟明突然對着燒衣爐大叫：「我會幫你討回公道。」記者問他如何討回公道，他說：「過一個星期會有行動，到時你哋會知㗎啦！」
此外，何韻詩昨日出席一宣傳活動時，透露獲許冠傑邀請做演唱會嘉賓令她受寵若驚，日前對方更送了一支結他給她。對於梅媽指摘劉培基（Eddie）自把自為在金像獎上台替阿梅領獎一事，何韻詩說：「呢個係阿梅事業上嘅榮譽，喺工作上同佢拍檔最多嘅係Eddie，佢嘅資格同地位無可置疑，好多人同梅媽解釋過，我唔想講太多，今日係阿梅一百日，唔想有乜嘢是非。」何韻詩又表示該獎座會放在信託人處。
另一方面，何韻詩和阿梅一眾徒弟昨日在志蓮淨苑替阿梅辦法事。何韻詩說：「今日係有活動，成班徒弟一齊搞，省善真堂唔去囉，一嚟冇人同我哋講，二嚟驚佢（梅媽）會鬧唔敢去，有心就得嘅啦。」
而昨日何韻詩接受商台電話訪問時，被問到對梅媽所指的「刮龍徒弟」有何看法時，她說：「其實我自己就真係唔想講咁多，最緊要做好本份。」
採訪：王連連、何永寧 攝影：陳志嵐、陳慧安
