人大常委釋法，雖經某啲港區人大挑撥離間地誣指「二○○七年以後」不包括二○○七年，又點名唱衰董建華治港冇威信，又慫恿中方主動否決○七普選，但中方豈有咁蠢，背負天下罵名，冇中班老左嘅毒計，反而將個波交畀特首，講明：二○○七年特首產生辦法，可以修改，亦可以唔修改，若要修改，阿董要自己提交報告，再由中大常委（亦即中國政府）審查，再確定基本法附件所講嘅「如有需要」，究竟係有冇需要。
凡心水清嘅，睇吓人大釋法全文，再聽吓喬曉陽答問，就知道雖然中方明畀特區揀A餐（可以修改）或B餐（不必修改），但其實個心，好想特區政府自動識做，揀「不必修改」嘅B餐。
若然特區政府自己揀咗「不必修改」嘅B餐，唔提交報告，中方就可以上向美國政府布殊阿公有所交代：我冇干預特區內政，係佢哋班𡃁自己唔要○七普選啫。
一個真正忠心愛國嘅特首，喺呢個歷史性關鍵時刻，一定要犧牲小我，自己飲咗眼前杯苦酒，義助國家逃過被美國政府譴責，甚至被英國政府狀告海牙國際法庭話中方違反中英聯合聲明嘅國際面子大浩劫。
不過，弊嘞。明明「如需修改」始終要由人大常委來定奪，但係曾麟詩政制發展三人專責小組嘅組長煲呔曾，一早就爆咗響口，話過去兩個月，會見咗八十幾個團體，「一般意見」認為，二○○七特首選舉及二○○八立法會選舉辦法，「有需要改進」。
咁即是話，釋法之前，三人組經已爬咗頭，自己揀咗A餐，未結婚，搶先洞房，強行同港人預支咗蜜月。咁就即是阿董亦冇得揀，一定要向北方提交報告，揸住一塊染有血迹嘅白手巾為憑，話○七○八，通通有需要修改。
若然阿董以特首名義，大大聲話畀人大常委聽：A餐，Yes。咁人大常委，不看曾面看董面，若然跟住話Yes，咪即是堂堂我國政府變咗當奴嘅橡皮圖章？若然國家咁都肯制，全港六百萬人就應該恭喜阿當奴：下屆特首，非我哋煲呔莫屬，甚麼唐唐振英哥，好快啲冚牌，自動宣布收檔。
之不過，若然人大常委話畀特首知：你個報告，我哋睇過，不過我哋祖國認為，○七○八，都係毋須修改。即是你話要A餐，我現時老實話畀你聽：A餐賣晒，我要你食B餐。咁咪輪到我哋阿董被迫上與國家直接對抗嘅火線，嘩，到時鄔維庸之流，咪會執生再加把口：「嗱嗱嗱，我都話阿董喺中央眼中冇威信喇，佢唔止同港人脫鈎，重同國家領導人嘅心思脫埋鈎，咁阿董重唔快啲喺九月前退位，換過一個同中央永冇脫鈎嘅梁英哥做特首？」
所以人大一釋法，換咗鋪玩法，中國政府一箭三數鵰，既考阿董，又預考埋煲呔。三人組另一條出路，就係嗱嗱聲改口話自己搞錯咗。經諮詢多另外八百個包括維園阿伯在內嘅親中愛國團體，發現「絕大多數意見」認為：○七○八，全部「需要修改」，就係：○七年特首改由國家欽點指派，○八年立法會選舉，取消三十席直選，全部改由國家委任。呢個報告，由特首提交，咁就你好我好，大家好。
傳真︰2623-9278
電郵︰