皇馬今季搞成咁，我求大俠就覺得好關乎佢哋買賣球員策略；之前西班牙盃決賽，就輸畀季前話簽又唔簽嘅阿根廷後衞米列圖所效力嘅薩拉戈薩；前晚歐冠盃就輸畀棄將摩連迪斯效力嘅摩納哥！
據稱皇馬會長佩雷斯係嫌米、摩兩人都乏「星味」，以及睇死摩納哥唔慌會係佢哋爭歐冠盃嘅障礙；至夾硬話米列圖有傷不能通過體測而放棄羅致，以及外借摩連迪斯至摩納哥兼准許倒戈上陣。結果咪畀到人打爭氣波嘅機會囉！
你估曾揚言一年簽一個球星嘅佩雷斯，來季重會否繼續向住個「星」字執迷不悟呢？
車路士淘汰阿仙奴入歐冠盃四強後，領隊雲尼亞里眼濕濕，好似想喊咁。雲尼亞里一直被指會烏紗不保，𠵱家佢幫隊波歷史性入歐冠四強，總算爭番口氣。雖然車仔班主阿巴莫域治重未表態，但若然雲尼亞里真係幫球隊捧個歐冠盃返嚟，就算留唔到隊，睇怕大把球會爭住要。
溫布頓喺前晚英甲聯夜賽，主場輸埋畀新特蘭一比二之後，正式宣布來季要降落乙組作賽。我求大俠諗番當日溫布頓由韋斯仔、鍾斯等性情中人帶領下，踢出嚟嘅「癲佬」足球風格，就算對住強隊都可以爆冷，娛樂性十足。如今落得此下場，都有啲欷歔，希望佢哋早日打番上嚟啦。
摩納哥對皇馬，賽前唔少球評家認定係例行公事，但國際米蘭就鬼咁重視呢場波，成班波出征法國就順便派球會高層（技術總監白蘭卡、經理奧利亞里）考核三位羅致目標，即係摩納哥嘅洛芬、艾華同埋史基拿斯。結果前兩者都有貨交，經此一役，唔知國米今夏會唔會出手嘞。
分別有姚明同勒邦占士壓陣嘅火箭同騎士，前排形勢大好似乎季後賽在望，但近排形勢逆轉，呢兩支球隊連輸五場，騎士要晉級機會渺茫啲，而「食老本」嘅火箭雖冇騎士咁危乎，但𠵱家喺西岸只領先第八嘅爵士一場半，如果喺餘下五場波重唔爭氣，我都好替佢哋擔心！