香港電影金像獎今年破天荒公開獎項的得票率，此舉有指是因杜琪峯曾質疑金像獎不夠透明度，吳君如卻批評不應為杜琪峯一人而令他人尷尬，昨日杜琪峯卻反駁君如說：「用佢嘅智慧分析吓！」
杜琪峯年前曾向香港電影金像獎董事局主席文雋反應，該頒獎禮若要做得更公正，不妨考慮增加透明度，今年香港金像獎果然從善如流，破天荒公開了所有獎項的前三位得票率。
然而票率公開後卻引起爭議，支持與反對之聲不絕，例如吳君如就認為不應因杜琪峯一人，令其他提名人感到尷尬。昨日杜琪峯為此感到不悅，他接受電話訪問時說：「唔該啲人要發表意見，就返電台發表，我覺得自己想為金像獎好嘅意見，俾人曲解咗，吳君如小姐最好了解一切，用佢嘅智慧分析吓，了解一切至再講。我作為電影人，我嘅意見金像獎接受與否，當然係由大會決定，佢哋用乜方法去做，唔係由我決定。」
杜琪峯又說：「金像獎任何改革，當然係佢哋嘅大智慧決定，並唔係為杜琪峯一個人，唔好講到好似被迫咁，咁講法係咪所有反對聲音都可以叫佢哋改？𠵱家咁講，好似講到我好霸道，我覺得好似俾人擺上枱咁。」
在周日舉行的金像獎頒獎禮，杜琪峯沒有出席，他解釋說：「嗰日要開工先至冇嚟，我唔出席並唔係我唔尊重大會，如果唔尊重，我就唔會填表報名角逐獎項啦！」
君如昨日回應說：「我嗰番說話唔係針對阿杜，係針對金像獎嘅基制，呢番話只係一場誤會，下次見到阿杜都唔會尷尬。」
文雋昨日亦勸杜琪峯不要太勞氣，他在電話中表示：「阿杜係重要導演，我哋重視佢嘅意見，今年先會增加透明度公開票率，其他反對票數公開嘅聲音唔使理，阿杜亦唔使勞氣，入圍已經係榮譽，公開票率，我唔覺得會尷尬。」